上市的醫療股唔多，加埋近日在內地收購醫院轉型的，亦只不過得幾家，有近7年歷史，以集團式經營，而近年業務又發展迅速的，就非康健國際（8138）莫屬。
中港醫療制度正進行改革，市民對私營的醫療服務需求肯定大增，醫療市場前景樂觀，基金要分一杯羮，買醫療股，康健係龍頭，秤先好多，唔買佢，買邊隻？
今個月已有4個基金上車同增持。兩個月來，康健雖已升近倍，但基金仍然大手入股，對公司前景的信心，可以得見，而康健股價升勢亦添加新的動力。基金入股，睇長線，股價再升一兩個開的機會好大。本月2日，荷銀（倫敦分行）同西京投資分別認購1.85億股及1000萬股，作價0.5412元；到8日，景順投資（Invesco）及Fair投資管理分別認購2.688億股及5120萬股，作價0.61元。事隔僅6日，配售價已高出12.7%，基金冇計較，明顯係睇遠景，食大茶飯。西京增持後，持股量已上升到5.13%。
基金入股有啓示
景順投資母公司AMVESCAP，係全球最具規模的上市基金管理集團之一，在倫敦、紐約及多倫多上市，目前管理資產總值逾4700億美元，亞太區佔約200億美元。景順入股康健，只動用1.6億港元，對佢嚟講，係小兒科，但大雞食細米，必有所圖，對投資者來說，亦係一個上佳嘅提示。
康健飛躍發展，過去1年，已完成3項大計，包括：ヾ附屬公司香港體檢（397）的體檢中心已啓用，並已拓展自由行旅客市場；ゝ位於佐敦佔地5000方呎的牙科中心已開業；以及ゞ與華夏醫療（8143）共同投資福州惠好口腔醫院。
未來1年，康健會進一步擴大內地醫療網絡，在福州及附近地區開設30間醫院及診所，其後再擴展至上海及北京；另外，集團亦已部署收購多個項目，包括美容、保健及植髮等，以及成立更多的專科醫療中心，以切合不同之醫療需要。
睇番走勢，康健上周裂口高開，衝上1元後調整，上周五收0.89元，已回落11%；後抽隨時完成，下一個升浪，衝破高位阻力，初步上升目標係1.40元，短炒長揸俱宜。