即將改名為「蒙古能源」的新世界數碼（276）上周五股價狂升24%再創新高，比同聲同氣嘅金匡（286）升幅23%更高，似乎唔係配角，而係主角。新數碼自公布變身能源股後，在過去短短4個月，市值已由4.7億元暴增至170億元。
同一貫旗下公司由姓鄭人士主理唔同，新數碼主席係彤叔掌櫃魯連城，董事會亦唔見鄭姓人士，擺脫了以往的家族管理影子，也令現管理層有更大發揮空間。事實上，近月集團接連搵來多名猛人加盟，先有擅長做刁的法務總監高朗，其後是喺煤礦行業有28年經驗的首席執行官金德智，之後再請來有中國地熱學之父之稱的任湘，個個來頭唔細，唔似玩玩吓扮轉型。
上個月新數碼股東會通過以12億元代價收購蒙古煤礦，從會上管理層的言論，或可推敲公司仲有乜消息可炒。首先，管理層表示正有10多個礦場意向書在洽談中，暗示日後還有收購進行；其次是蒙古資源極之豐富，上述收購的煤礦儲存量遠遠不止通告估計的3億噸，實際勘探量好快公布；最後係中國缺電，產出煤後可向內地供輸，早前並與蘭州電廠訂立供煤意向書，且不排除搞埋發電業務。新數碼有得炒嘅好消息，隨手都有幾件。
世城債主貨待消化
同樣係蒙古搞礦，世紀城市（355）股價表現就差得遠矣，該公司自宣布成為首家開採鈾礦的上市公司後，隨即被以往銀行債主出售透過以前收落嘅CB所換取之股票套現，龐大沽壓令股價完全升唔起。近日世城請記者親赴蒙古睇礦，個礦嘅真偽應毋須懷疑，問題係仲有幾多債主貨等沽。