無綫劇《溏心風暴》收視理想，一班同劇演員進入收成期，商場表演、登台工作接個不停，飾演大契的李司棋昨日更連走兩場，先夥拍好拍檔細契關菊英在九龍一商場宣傳，其後再會合周麗淇為另一商場擔任嘉賓。不過最令大契開心的相信是女兒葉子青以越洋錄音祝她母親節快樂，大契卻寧願每天收到女兒的來電。
大契李司棋跟細契關菊英昨日在奧海城擔任母親節活動嘉賓，吸引近500名市民圍觀。兩人雖被傳不和，不過她們昨日手拖手出場，又扮互咀闢謠。
感動眼泛淚光
適逢昨日母親節，大會播出司棋姐在加拿大多倫多女兒葉子青的越洋錄音（詳見附文），子青除祝媽媽母親節快樂外，更談到兩母女經過七年斷絕音訊後冰釋前嫌的經過，並稱母親「大契」，令台上戲路縱橫的大契不禁眼泛淚光。
大、細契在台上和觀眾玩遊戲及唱歌，最搞笑是邀請現場觀眾上台重現大、細契的經典吵架對話，不過就變成鄉音滿天飛及自作對白的場面，引來哄堂大笑。司棋姐接受訪問時表示，對女兒的越洋錄音感到驚喜，是很好的母親節禮物，她笑說：「係有少少激動，不過如果日日有電話嚟就仲好。雖然今日要開工，不過就算唔使開工，都係同啲狗去海灘玩。」她表示往年這日子會和母親一起到妹妹家跟子姪一起，但母親剛去世，今年只得自己前往。
細契關菊英則謂昨日剛從內地回港，近日接到不少登台邀請，她表示會拉攏司棋姐一起前往，她說：「頭先佢唱嗰首歌都好好聽，一齊去可以有伴。」
周麗淇大頭蝦
此外，大契與周麗淇和孫耀威到太古城出席商台活動，周麗淇本來趁佳節與家人飲茶慶祝，埋單時卻找不到銀包，幸最後於家中尋回，認真大頭蝦。
採訪：何永寧、藍文浩
攝影：陳順禎、藍文浩
葉子青給媽媽的話
「Hello，Mummy，HappyMother'sDay！Mum，我哋今年嘅母親節又要分隔兩地，但你記唔記得10年前發生咗乜事呢？10年前我啱啱大學畢業，走去電台做DJ，我嗰陣時知道只要我一開咪，就好多人知道我係李司棋個女，嗰陣時我哋已經有7年完全冇通訊，我唔想你要喺外人嘅口中知道我嘅動向，於是就的起心肝打個電話畀你，當時係婆婆聽電話，婆婆唔認得我把聲，以為我係你喎！跟住仲話包咗餃子，問你返唔返屋企食飯，估唔到婆婆𠵱家都離開咗我哋㖭！
其實我真係好開心我打咗嗰個電話，更加開心就係你原諒咗我，原諒咗我細個嘅時候唔係好識得諗，唔係好識得去體會乜嘢叫做母愛，我真係好開心𠵱家有番個媽咪，𠵱家見到媽咪你做《溏心風暴》咁受歡迎，我都忍唔住要叫聲大契，今日咁多人同大契一齊度過母親節，我諗你都唔會寂寞嘅，HappyMother'sDay呀媽咪！」
