今屆日職聯除咗睇浦和紅鑽同埋大阪飛腳，亦要昅實三浦知良（簡稱Kazu）。點解？事關Kazu佢寶刀未老，仲成為日職聯史上首個年過40入波嘅日本球員。
紅鑽飛腳和波齊失分
Kazu前日入1粒，幫升班馬FC橫濱贏廣島三箭2:0，結束聯賽8場不勝。呢個入球對佢意義重大，事關係佢今屆第1球，佢更加以40歲兩個月零16日，成為日職聯史上首位年逾40入波嘅日本球員，以及繼巴西名宿薜高（41歲3個月零12日）之後第2個最老入波球員。
Kazu賽後話：「呢個係我踏入40歲後首個入波，個人紀錄唔重要，最緊要幫球到球隊贏波。」咁又係，FC橫濱𠵱家排尾2，如果再唔加把勁，下屆分分鐘返番乙組，相信足球生涯開始倒數嘅Kazu都唔想爛尾。
至於噚日場榜首大戰紅鑽主場對飛腳，卒之打和1:1；呢個賽果搞到兩敗俱傷，事關飛腳雖則繼續領先，但只係比第2嘅川崎前鋒多1分；紅鑽仲慘，由原來第2位跌落第5位。今季踢咗3分1，頭5名只有兩分距離，嚟睇隨時好似前屆咁，鬥到最後1輪先知邊隊冠軍。