有親中背景嘅互聯網專業協會（iProA）噚日搞咗個研討會，同啲青年講吓點樣喺IT界創業，巴閉到搵咗「真民主」李澤楷做嘉賓，小小超講咗兩樣嘢，一樣係政改，另一樣係創業。小小超重申，希望2012年有雙普選，至於模式及進程，佢個人知道煲呔政府即將推出嘅政制綠皮書，會包括好多方案，關心民主進程嘅人，應該踴躍發表意見。
佢自己會睇咗綠皮書，睇吓有無聆聽到香港市民嘅意願先至作出評論。煲呔交唔交到貨畀「真民主」，八方拭目以待。
講到創業，小小超話想喺科技同創新媒體行業上面成功，就一定要有夢想，之後就係點樣將夢想變成現實。佢話除咗要有創意之外，仲要專注、小說話多做事，最後就係要有一顆不停追求突破嘅心。
一位與會中年男士即時學到嘢，將提問環節變成個人廣告時段，佢話見過好多IT人創業失敗例子，嚟呢個研討會目的就係想踫吓運氣，想搵吓有無啲有創意嘅IT後生仔，同佢傾搞創意工業，不過好似冇乜人騷佢。