一個冇驚喜嘅英超，今個星期煞科！曼聯冠軍、車路士亞軍、利物浦、阿仙奴有歐聯資格，永遠都係熱刺愛華頓打歐協盃！睇咗咁多年，真係有啲悶兼有啲失望！
聽晚，極度令我失望嘅車路士迎戰愛華頓。首先，對於失去聯賽冠軍嘅「車仔」，塞翁失馬焉知非福，「塞翁得馬焉知非禍」！之前攞咗兩季聯賽冠軍，令「車仔」一眾球員不思進取，唔研究一啲新嘅踢法，大家經過兩年時間，摸清「車仔」嘅路數，加上傷兵問題，終招一敗！不過，今季失利兼歐聯再次出局，相信「車仔」一眾球員已得到教訓，下季必捲土重來。
面對愛華頓，相信會同上場對曼聯一樣，收起大部份主力；不過，呢眾主力都可能會後備上陣玩下。話晒係最後一場聯賽，要答謝江東父老！而「車仔」球員心態上，已經放眼足總盃，冇必要搏，和波係最理想嘅戰果。至於愛華頓，輸贏冇所謂，足協盃參賽資格已經攞到手，仲搏咩！大家一於要和波兼入球開「細」啦。
周鵬
商業1台《球迷集中贏》主持
電郵：[email protected]