八方「恨」食住家飯，行會成員陳智思卻話諗起就驚，因為佢媽咪最叻「藤條炆豬肉」，「用今日嘅標準，可能已經俾人告虐兒。」八方問佢細個係咪好曳，佢「賴」阿媽惡死，揸筷子姿勢唔啱，阿媽就搣佢手腕，又唔畀佢食飯，捱打又捱餓，認真淒涼。
家有嚴母，所以陳智思後生時唔黐家，去到美國留學直情「甩難」，直到18歲一場大病，媽咪飛去美國照顧佢，兩母子住埋一齊兩個月，日見夜見，大家都真情盡露，有乜唔滿意、有乜誤會都一次過拆掂晒，「到嗰時先至開始理解媽媽一心為我好嘅想法。」
陳智思有兩個仔女，𠵱家教仔梗係唔可以好似當年咁棒下出孝兒，佢話雖然到𠵱家都唔係幾認同當年媽咪套教仔方法，但母親「肯定教啱咗我好多嘢，否則兩母子今日可能仲係互不理睬。」陳智思話上禮拜已成家人慶祝母親節，今日會再陪媽咪食飯。