今天是母親節，大家向媽媽說聲「我愛你」之時，名模媽咪琦琦卻相反要多謝囡囡Ella。她表示從得悉懷有Ella當天開始，才明白真正的幸福是甚麼，從此有着無法言喻的快樂，只要Ella在她耳邊輕說一句：「媽媽，我愛你！」就足以抵銷所有辛苦。琦琦說出天下間母親的心底話，作為母親，養育子女是不求回報的，在母親眼中，子女已是最簡單最好的禮物，難怪琦琦說：「天天都是母親節。」 撰文：林妙萍
琦琦和任達華育有兩歲半小女兒任晴佳（Ella），年紀小小的她已經在世界各地如上海、維也納和香港擁有自己的物業，叔叔嬸嬸爭住錫，新年時收到過百萬利是，長期有兩、三個傭人照顧，人人覺得小Ella是萬千寵愛在一身的小公主，被笑是廿四孝媽咪的琦琦，反而覺得自己能夠成為母親，養育女兒，才是最幸福的一個，看着女兒一天一天地長大，囡囡每日輕聲用普通話講三四遍「媽媽，我愛你！」，已經讓她心甜滿足。
懷孕開心到喊
日前琦琦帶着Ella在淺水灣做訪問，原意在藍天白雲、陽光草地下踢足球，可惜天公不作美，下着綿綿細雨，平時精靈活潑的小Ella又因為感冒初起而發燒、咳嗽，慵慵懶懶地不斷扭計，琦琦說：「我噚晚知佢唔舒服，趕返屋企時即刻抱住佢，Ella面青青好唔舒服，之後狂嘔噴晒落我個身度，我啱啱做完嘢，心急睇佢未換衫，成身LV由底到面濕晒，一見佢嘔完舒服晒，我鬆口氣，所有嘢都冇所謂！」琦琦和其母親在訪問前一晚徹夜未眠照顧Ella，見Ella稍好，才安心下來。捱更抵夜都甘之如飴，相信只有為人父母才做得到！
琦琦牽着Ella的小手，圍着水池行來行去和玩水，Ella一時從後攬住媽咪，用普通話輕聲說：「媽媽，我愛你。」一時又錫嘴，看到的人也心甜，更何況是媽咪？琦琦笑着說：「我日日都係母親節，每日對住Ella我都好開心，小朋友帶畀屋企好多快樂，無法用文字說話去形容。」
琦琦回想當年未知有身孕時，與任達華去泰國玩，跳水、跳舞、遊飛機河和狂飲椰青，做足一切孕婦禁忌，故此當得知懷孕後，琦琦開心又緊張，當日情景仍歷歷在目，她說：「我喺醫生度做緊檢查，已經忍唔住打電話畀Simon（任達華），我一開聲話：『老公，我有咗呀！』當時啲眼淚喺兩邊不斷咁流，Simon開心到大叫。後來為女兒改名做晴佳，意思係希望女兒好似晴天咁一樣開朗，天天都開心健康。」
為女兒捱眼瞓
做母親，每天都有新鮮事，囡囡第一次開口叫「媽媽！」、第一次轉身、第一次行路，長的第一隻牙，都令琦琦一家活在歡欣中。問她這兩年半來，最難忘的一件事，琦琦不假思索說：「第一眼見到自己嘅BB！大住肚10個月，照超聲波、個肚會郁，但一直對BB係冇印象（概念），生完我一睜大眼，見到佢隻眼、面仔、手仔，嗰一刻，先知乜嘢叫幸福！」
任達華常常到外地拍電影，琦琦又身兼大量品牌代言人，難怪琦琦表示要陪伴囡囡成長，只有一個方法：「犧牲自己瞓覺時間囉！我做事100%投入，做媽咪都100%投入，唔想錯過佢任何一個成長時刻。」囡囡星期一至六返學前班，琦琦就每朝6時半起床帶囡囡返學，之後安排自己的工作，拍完廣告、影相和開會後，再接女兒放學，一起吃晚飯。」
媽咪來港照顧
琦琦從不打罵女兒，更不覺得寵愛女兒是縱容，只是希望提供一個單純、充滿愛的環境讓囡囡成長，琦琦說：「小朋友喺成長時，有愛同家庭做backup，小朋友就會有正面思想同諗法，將來就唔會行差踏錯。」任晴佳精靈可愛，手長腳長，大有機會踏父母之路做模特兒或明星，琦琦說：「做媽咪嘅願望好簡單，只想佢係一個樂觀、快樂同單純健康嘅人。」
作為媽媽，也作為女兒，琦琦由心感激母親特地由維也納飛到香港照顧小孫女。今天母親節，她們會舉家出外慶祝，琦琦說：「我問媽咪，你想要乜嘢禮物？佢話：『唔使喇，我同你同Ella一齊就得喇。』嗰時我自己又諗，如果Ella問我要乜嘢禮物，我都係會話唔使喇，因為佢係上天畀我最好嘅禮物。」
攝影：陳慧安 場地提供：Indigo
