選美出身、大家閨秀、結婚離婚再結再離、患病，還有母親病逝……熱爆的大契返回現實，大家以為是喊苦喊忽、相依為命的感人故事。
實情是，她跟女兒曾經七年沒有交往；她口中的媽媽是古代女人，唔算好傾，飲茶與否，也是嗌交導火線。
演過那麼多電視劇，她說沒有一個角色是真正的她，她不是善姨，更不是運籌帷幄、指揮若定的大契。
她當媽媽，不要陳腐的康乃馨陪襯，不要大家憐憫，不要喊苦喊忽。
她當媽媽，一點都不需要驚天地、泣鬼神。
她跟女兒，是夜空中守望的兩顆星，恰如其份，每顆星自有命運；凡人站得太遠，才以為靠得近。
你們沉迷，你們對號入座，你居然以為《溏心風暴》就是現實。
李司棋專業，知道自己是李司棋；太入迷的，只是觀眾。
記者：張嘉雯卓美娟
《溏心風暴》捲起了一場捉鬼潮，人人睜着兩眼、口中一句：「邊個係人，邊個係鬼，我睇得出。」
現實版的李司棋，56歲，經歷過兩段婚姻，兩次都分手收場，不算帶眼識人，係人係鬼，原來好難分。
女兒葉子青怪責她只愛工作不愛自己，消失了七年。
「佢打個電話畀我，咁咪冇嘢囉，咁多年，都冇嘢啦！」當時千頭萬緒，司棋姐說來淡然，像冰塊溶掉的檸檬茶。
「佢有一半似我啦！對人好闊佬，佢比我叻，但係冇乜商業眼光，前面有條生意路，佢都睇唔到。佢貪靚，鍾意買衫，就似足我。」李司棋年輕時已經在電視台當紅阿姐，有雜誌說她現時家住尖沙嘴一大廈，樓上是一間時鐘酒店，生活潦倒，她說她跟女兒一樣，是不擅投資的人，「我樓下真係有間時鐘酒店，不過我又唔係後生女，唔通會以為我做雞咩，我覺得完全冇問題。」
丈夫 好男人唔易搵
女兒像她，性格眼光都像她，命運也有點像她。
女兒2001年結婚，2005年離婚，最近開展另一段婚姻生活，「佢話同對方相處唔到，我同佢講婚姻係要忍，有時係有啲關口要過，嗰時我成日叫佢祈禱，不過佢話好唔明點解婚姻唔OK要祈禱，後尾佢再識咗第二個，做媽咪嘅會幫佢擔心，好男人唔係咁易搵，不過講到尾其實都係想佢自己開心。」
女兒長大了，跌過痛過，跟媽媽靠得越近，無所不談，「我覺得佢好靚，細個唔想佢做明星，但係都冇諗過應該做乜，Daddy想佢做律師，最終做media。佢好細個已經好識傾偈，佢喺Toronto（多倫多），應該幾好、幾開心，生活唔同香港，佢工作係幕後做行政，做大show司儀，應該okay，我相信佢嘅選擇。」
女兒 希望佢活得開心
「由dayone開始，我都係希望佢活得開心，希望佢食得飽着得暖，唔會有好大工作壓力，唔使賺好多錢，我乜都唔需要佢有，最緊要佢開心，如果佢活得開心，我死都死得安樂。」
「前幾日夜晚七、八點我同朋友食飯，嗰度唔畀開手提電話，見到佢呢個時間call我好緊張，即刻打返電話畀佢，佢話放假煲緊《溏心風暴》，仲問埋劇情，真係好似Fans咁。」司棋姐不期然沾沾自喜，「連個女都有興趣，我以前做《逐個捉》嗰陣，佢仲細，唔係好記得。」
大契在劇中有懾人氣魄，一句「呢度唔係法庭，唔需要證據，我對眼就係證據。」聽得觀眾眼定定。現實中，司棋姐的聲音溫婉，但自言「built-in」了大契的辛辣，尤其對女兒，「有次我哋成家喺屋企包水餃，阿姨、婆婆一齊包，諗住佢第二日返加拿大畀佢食，點知佢出咗街，成十點幾先返，仲食埋飯。佢返到嚟，你話我係咪好㷫？我嬲佢唔領情，尤其係婆婆，令老人家唔舒服，我同佢講，『你跟我入嚟』，跟住我鬧咗佢一餐。」媽媽本色，此刻盡顯，「做人要有口齒，應承咗人哋要做嘅就要做到，唔可以咁兒戲，嘥晒人哋嘅心機，𠵱家婆婆都死咗，相處幾珍貴，呢啲細微嘢，要教。」
母親 永遠掛住佢
母親節，其實好無聊，司棋姐沒有特別慶祝，「個女會寄水晶公仔或者小玩意畀我，試過寄失，我叫佢唔好送，唔係唔領情，香港買乜都有，費事嘥郵費，好無謂，打個電話傾吓偈就得啦。」
司棋硬，她的媽媽更硬，她直言媽媽是那種賢淑的古代女人，「細個就好好傾，大個就好唔同，感覺上好錫我，但我哋對佢好，佢拒絕㗎，我哋請佢飲茶，佢死都唔去，都唔知因為咁嗌咗幾多次交。」嗌交？「係呀，好嬲，問佢，咁你去唔去？唔去唔去？去飲餐茶冇乜嘢吖，大佬，難得一家人一齊。」
今年2月，媽媽走了。
「我17歲就瞞住屋企去選美，21歲就結婚，因為媽咪管得嚴，嗰時成日諗結咗婚就自由。媽咪走嘅時候90幾歲，喺佢最後嘅日子，佢每日都瞓得好少，後來佢返咗大陸住，我請咗三個工人全天候24小時照顧佢，佢走咗，我永遠都會掛住佢。」
