「加利仔有三樣嘢唔好：第一，無速度；第二，跑得慢；第三，唔夠快。」繼球評家黃興桂家喻戶曉的「加利仔金句」後，最近網上又流傳多句「講波金句」，包括：「長捧利物浦，遲早要走佬」、「重槌阿仙奴，得番兩條毛」等等，令不少網友捧腹大笑。
一口氣數所有球隊
網友蘭花子安近日在高登討論區幾乎一口氣數出所有英超球隊的賭波金句：「膽拖紐卡素，搞到人都躁；單win布力般，買定副木棺；想買愛華頓，驚李鐵論盡；大膽買保頓，結果要自盡；錢多買曼城，咪鬼詐我型；錢少買富咸，俾人打到殘；阿士東維拉，輸到你亞皆老街；朋友貼狼隊，九成係吹水；高水列斯聯，半場前玩完；低水查爾頓，贏咗冇利潤；放棄伯明翰，唔使兩頭望；樸茨茅夫渣，根本冇得打；廢柴叫熱刺，千祈唔好試；番閹修咸頓，對手腳風順。」
有網友更正有關利物浦的金句說：「若要生活好，要買利物浦」，但事實上，最流行的利物浦金句應該是：「若要生活好，不買利物浦」。網友謝拉特稱：「睇波不賭波，睇來幹甚麼？」
英超金句節錄
長捧利物浦，遲早要走佬
重槌阿仙奴，得返兩條毛
瞓身車路士，車爛部電視
曼聯靠符碌，作惡奧脫福
資料來源：高登討論區