教院大戰教統局世紀聆訊隨時好睇過啲咩咩風暴，噚日審到教院校董會主席梁國輝，之前教院校長爆佢同煲呔見面內幕，輪到佢作供，就煮重對方米。
話莫禮時對於教院同中大合併，其實唔係完全無得傾，仲一時一樣成日轉軚㖭，佢越講越㷫，激動到主持聆訊嘅楊官驚佢有事，提議佢唞唞再作供。
講完莫禮時嗰筆，梁國輝又數記者不是，05年佢接受訪問時講過教院唔合併好難升格，噚日卻真人演繹「打倒昨日的我」，話自己只係講嘢技巧唔好，俾記者跣，仲話好嬲自己講錯嘢，答問題答得衰。
審完出嚟，梁國輝好似仲谷住谷住咁，咩都講晒啦，仲有料爆咩？原來佢作供時急尿，要即刻搵廁所啫。