由鄧萃雯、商天娥和葉童等主演的無綫新劇《師奶兵團》，將於下周一晚推出。飾演師奶的雯女，現實中也是自小就要打理家務，但她極度大懵，煲湯經常煲亁水，煮食時更試過煲底穿了也不知，嚇得其母要立即把雯女全屋煮食用具換上電子產品。
新劇《師奶兵團》中，三個師奶鄧萃雯、商天娥和葉童本是中學同學，雯女當年是校花，與葉童均是學校風頭躉，二人不時鬥個你死我活，娥姐則是雯女死黨，沒料到三人結婚生仔後，竟巧合地住在同一居屋，令雯女與葉童當年惡鬥得以延續。
四年班已煮飯
不過，新劇除圍繞幾個師奶在生活瑣事上大鬥法外，更會講她們如何面對社會和丈夫子女帶給她們的壓力，為師奶存在價值定位。
原來雯女當初接演這個角色時，不少工作人員也看扁她，認為她不懂做家務，雯女日前接受訪問時說：「拍嘢時啲人猛問我識唔識做家務，我心諗，我識做家務嘅時候你哋都唔知喺邊度啦！我係跟阿爺阿嫲大，四年班已經要煮飯，因為我嫲嫲有風濕病，手腳唔係太靈活，所以好多時家務都係我做晒。當時住廉租屋，冇自己嘅房，我要做晒家務、等家人瞓晒覺先至有自己空間做功課，所以自細我已經係隻貓頭鷹，好夜瞓。」
即變電子爐具
儘管雯女自稱從小已做家務，但她卻是個相當大懵的人，她笑說：「其實我同《師奶兵團》裏面嘅角色好相似，都係咁大懵，唔係大家想像中咁強，我除咗好冇方向感，經常迷失路之外，喺屋企煲嘢經常煲亁水，仲試過煲到個煲底穿咗都唔知，係我阿媽返到屋企先至發現，驚到佢叫我以後唔好開火，買過晒啲電子瓦罉同壓力煲呢啲唔使開火嘅嘢畀我！」
採訪：戴彩煥
