TVB大台作風，一向政治正確，近排搞埋正字，製作《最緊要正字》教市民讀正音，連卡通片角色都唔例外。月前播出嗰套日本動畫《聖鬥士星矢冥王十二宮篇》，主角「冥（音皿）鬥士」，忽然變成「明鬥士」，「冥王星」讀成「明王星」，原來TVB下「聖旨」，成班正義聖鬥士都要以身作則讀正字，咪教壞細路，可憐星矢fans被人由細呃到大，偶像「冥」鬥士原來叫「明」鬥士，正字正確令集體回憶走晒樣。
鵪鶉要讀成「鵪唇」
90年代初TVB首播《星矢》系列動畫，掀起星矢熱潮，八方都成日捧場，前排TVB首播《冥王十二宮篇》，一班星矢迷擔定凳仔捧場，點知班主角冥鬥士一開口，個個變晒「明」鬥士，冥王星改讀成「明」王星，聽落好「銀」耳喎。有fans同八方投訴「TVB點配音㗎」，仲要播到一半就cut，大結局石沉大海，到喉唔到肺，激到班fans想用天馬流星拳打爆電視。
配音組小角色爆料，星矢要正字原來係高層旨意，讀音要以大學教授為標準，冥正音讀「明」，唔可以再讀「皿」，佢話同事都媽媽聲，「讀咗幾十年都係嗰個音，𠵱家要改，有冇搞錯？但係高層指令要跟教授讀正音，對學者奉若神明，做細嘅咪照讀囉，唔通同個飯碗鬥氣咩！」有配音員話正音仲有其他搞笑嘢，狒狒讀成「費費」，鵪鶉就讀成「鵪唇」，「你叫陳志雲試吓去街市問吓有無鵪『唇』賣吖？」
無綫外事部助理總監曾醒明向八方解釋，星矢主角讀正音，係因為TVB覺得做傳媒有教育下一代責任，故此配音組會參考何文匯教授本《粵音正讀字彙》同其他典籍。不過TVB講一套做一套，卡通片角色要正音，好似《溏心風暴》呢啲電視劇集或者其他綜藝節目，就唔使讀正音喎，即係話如果大契去街市買鵪鶉煲湯，唔使同個小販講話買隻「鵪唇」咁惹笑。
文化人鬧「攞嚟搞」
反對盲目讀正音嘅文化人潘國森認為TVB「攞嚟搞」，佢話語言用嚟溝通，「讀咗個無人聽得明嘅讀音，咁有咩用？」𠵱家被指係正音嘅讀音，其實係古音，既然時代唔同咗，應該接受約定俗成新讀音，「粵語文化唔係屬於一個電視台或者一個教授嘅，所有粵語地區，包括海外廣東人都分享呢套文化，閉門造車搞正音係自尋煩惱。」