葵涌邨綠葵樓一日之內發生兩宗命案奪去三條人命，難免有居民感到震驚及恐慌。精神科醫生李誠指出，大部份受影響居民經過與家人朋友傾談後，情緒會慢慢平復，但有抑鬱傾向的人士應找專業人士協助。風水顧問麥玲玲建議居民夾錢做法事，以求心安。
「面對命案，絕大部份人都會產生恐懼，但好快佢哋會明白，呢啲事件唔會日日發生。」李誠解釋，大部份人在命案過後與親友互相支持，很快便能平復心情。「但有抑鬱焦慮傾向嘅人，受困擾時間可能較長，例如會唔敢再睇呢單新聞，甚至會勾起過去一啲不快回憶，咁就要搵專業人士好似社工或者醫生輔導。」
風水師建議做法事
此外，風水顧問麥玲玲表示，同一地點短時間內發生多宗命案會有怨氣積聚，居民若想求安心，可以夾錢做法事超渡亡魂。「如果擔心招陰，屋企門口可改油白色、米色，日常着多啲淺色衫都有幫助。」麥玲玲補充，家門插柳枝也可辟邪。