海洋公園大熊貓網誌再更新，仲顯露大熊貓女盈盈嘅「惡女本色」，八方睇上載閉路電視短片，見到盈盈同樂樂搶食竹葉時，一個熊patpat（臀部），將樂樂掃落木架，慘變「滾地葫蘆」嘅樂樂仲好有紳士風度冇還手，睇嚟佢深明「打者愛也」道理。
肉地夠厚唔覺痛
第二篇網誌「5月3日─我愛窩窩頭」都係由樂樂撰寫，講兩口子到港一周嘅生活，「盈盈仲係一樣咁頑皮」，食早餐時盈盈見樂樂坐喺木架食竹食得咁開心，偷偷走上去，你推我撞之際，樂樂俾盈盈「大屁股」撞得像「滾地葫蘆」，但「肉地夠厚」嘅樂樂好似唔覺痛，仲繼續仰卧食竹。樂樂仲趁機高呼愛的宣言：「不過無論發生乜嘢事，我樂樂都會保持紳士風度，盡量遷就盈盈嘅，所以我哋兩口子總算和和氣氣，亦絲毫無損我哋嘅感情。」
樂樂又透露，護理員哥哥特別開發「新口味」窩窩頭畀佢哋，就係混入高纖維餅亁，「我同盈盈都覺得「高纖維餅亁味」同食開嘅「四川臥龍味」窩窩頭一樣咁滋味，一樣食得咁開心。」
上次首篇網誌出街幾日已經收到百幾二百個留言，Fans仲要求網誌設即時影像，24小時直播大熊貓真人show。嘩，咁樣叫人哋點樣開枝散葉呀？人哋會怕醜㗎。
大熊貓網址： http://www.oceanpark.com.hk/panda/index_tc.html