今日人人喊打的奸二奶細契關菊英，25年前憑與關正傑合唱《倆忘煙水裏》等歌曲走紅，卻為愛情放棄事業嫁給黎小田，當時急流勇退的她至今仍對兩年的短暫婚姻無悔，坦言仍然門戶大開做個等愛的女人。今日重出江湖，關菊英在《溏心風暴》中乞人憎得十分成功，登上人生第二個事業高峯，突然變得炙手可熱，風頭壓倒劇中一班年輕貌美的仔仔女女，令她坦言有「倒瀉籮蟹」的感覺。 撰文：楊潔雯
-發惡鬧人冇得NG-
唱而優則演，20出頭的關菊英憑唱電視劇主題曲走紅，現已年屆49歲的她，卻因參演《溏心風暴》登上事業第二個高峯，劇中角色細契跑贏一班小生花旦，與大契李司棋雙雙脫穎而出，關菊英說：「我都冇諗過做一個奸角，可以咁出，真係意料之外，大、細契咁受歡迎，我同司棋姐都好似倒瀉籮蟹咁，有好多雜誌、報紙同電台訪問嘅邀請，真係好忙，日日啲工作都排到好密。」
劇中米雪飾演的莉姨因懷疑細契做私幫生意騙公司錢，遭作賊心虛的細契狂鬧一幕，劇情精采萬分，大獲觀眾好評。關菊英說：「係，我都覺得好犀利，我哋好多時都冇乜嘢NG，大家背對白都好熟，尤其係鬧人，唔可以NG，唔係就『謝』晒，冇咗道火，做到呢個角色，要多謝TVB。」
網友喊打反高興
其實關菊英以往拍過的劇集也不少，大部份皆演好人，第一次在《溏》劇中做奸角，竟讓不少網友喊打，她說：「我都係第一次做呢類型嘅奸角，以前多數做乖乖女，我知好多網友同觀眾都好肉緊，睇到班網友話好憎我、話打我都係講笑啫，我相信唔會，𠵱家啲觀眾好smart，會畀意見你點做，又識睇穿崩，同以前唔同。以前我成日覺得同年輕一代有代溝，點知𠵱家有唔少年輕人都留意我，鍾意睇我，今次因為呢套劇有班年輕fans，我真係好開心。」
細契潑辣、霸道、咄咄迫人兼陰險奸詐，現實中的關菊英卻予人溫文爾雅、斯文大方及個性率直之感，跟細契判若兩人，關菊英說：「我唔敢講呢套係我代表作，但拍呢套劇真係過足戲癮，呢個完全唔係自己，劇本寫得非常好。」
-深信愛就係大晒-
細契甘心做人二奶，關菊英卻是一個等待真愛的女人，曾經傷過痛過，但她毫無怨恨，對自己走過的感情路無悔。1982年，24歲的關菊英芳華正盛，事業如日方中，但因一個「愛」字，她不顧一切嫁給黎小田。現時是單身一族的關菊英說：「我冇後悔，當年後生，愛就係大晒，我覺得愛情代表一切，兩年後離婚係因為覺得唔啱，唔想再拖，𠵱家知道結婚唔係咁簡單。」
坦蕩蕩會小田
移民加拿大後再回流香港發展，主持的第一個節目《超級靚聲演鬥廳》就是跟前夫黎小田合作，她說：「我唔覺得尷尬，反而當時幕後工作人員都驚我介意，我就覺得呢個節目冇人可以比佢更適合去做，我絕對唔怕同佢合作，我做人就係咁坦蕩蕩，冇嘢唔可以講，呢個年紀唔需要避，做唔成夫婦都可以做朋友啫。」黎小田身邊女伴如走馬燈般不停轉，位位都年輕貌美，關菊英說：「我冇特別留意佢嘅新聞，所以唔知呀！」
關菊英自言隨家人移民加拿大後曾拍過一次拖，她說：「拍咗幾年，聚少離多，我住溫哥華，佢住多倫多，再加上性格不合，咪分手囉！」經過兩次感情挫敗，近日又被指曾與好友張耀榮有過一段情，遭她斷然否認，但關菊英坦言對愛情仍充滿期望。
她說：「我好享受𠵱家嘅單身生活，我有屋企人，有一大班朋友，對愛情我仍然有要求，唔會隨便搵一個伴，要搵就一定要有愛，我深信每個女仔都係咁諗，我都係咁諗，我唔會同唔愛我嘅人一齊。」
50將至，關菊英對感情持開放態度，她說：「我都係開放門戶，不過又唔需要刻意，其實做我男朋友都幾慘，一定要錫我屋企人，我仲有一大班朋友，佢都要好錫佢哋。如果有一日，我搵到個我愛嘅人，都唔排除會再婚，世事真係好難講。」
-回流香港為家人-
關菊英當年隨着89民運後的移民潮，與家人共同進退移民加拿大過新生活，她說：「我同屋企人感情好好，一家人話要移民，咁我咪跟住去囉，我屋企人就好似《溏心風暴》裏面一家人咁團結，不過就梗係冇佢哋發生咁多事啦！」
加拿大生活清閒
在加拿大生活15年，回流返港同樣是為了家人，關菊英說：「加拿大生活好清閒，得閒就打牌同飲茶，有時我會去做義工，學吓其他嘢，平時都好慳，當地使費唔係好貴，後生時又喺香港儲到少少錢，夠喺加拿大生活用，所以我都唔使做嘢。
「今次返香港，都係因為屋企人好多都返咗香港發展，好多朋友同埋爸爸媽媽都喺香港住，所以舊年我正式搬返香港，初初決定拍電視劇係諗住試吓試吓，又驚觀眾唔接受自己，點知緣份畀我拍到《溏心風暴》呢個劇，真係好開心。」
菊英盛放30年
