電視進入大戰時代，亞視起勢挖角，有線又搞10蚊電視台，無綫嚴陣以待，呢排《溏心風暴》大受歡迎，但之後時段播映嘅外購劇《一生為奴》因收視慘淡，要即調時段，改播鄭少秋主持嘅《謎》救亡。
否認延長合約
亞視嘅《第一手真相》同《一生為奴》喺同時段播，上周收視仲升咗兩點，平均有八點（約51萬人次收看），所以亞視噚日特登喺總台搞祝捷會攞彩，話係佢哋個節目搞到無綫要腰斬《一》劇，仲攞咗啲劍出嚟斬開香檳，又拮爆咗一個寫住「謎」字嘅大氣球，暗示佢哋節目唔會好似《謎》咁，要估吓估吓喎。
無綫噚日就喺尖沙嘴舉行記者會，公布原定5月14號起播映、由狄娜主持嘅無綫節目《大國崛起》，會改喺七月先播。無綫總經理陳志雲主持嘅新一輯《志雲飯局》又開鑼，噚日喺尖沙嘴錄影，請嚟林夕做嘉賓。講到電視大戰，陳志雲好老定咁話：「邊有大戰呀，TVB梗係唔擔心啦，錢唔係令人去留嘅因素，最緊要係有發揮同開心。」佢又話冇即刻加長同藝員嘅合約年期喎。
至於無綫另一高層樂易玲噚日就接受商台訪問，問佢有冇俾人挖角？樂易玲話：「我哋呢啲新人有乜用呀？不過我多多錢都唔會走嘅。」佢仲話喺無綫做嘅藝員唔止為錢，都要睇將來嘅發展。講到羅嘉良、林文龍夫婦等成為亞視同有線嘅挖角目標，樂易玲就話呢啲藝人同無綫仲有約喎。
