高等法院噚日舉行資深大律師委任典禮，今年只得包毅成（StevenAshleyBurns）同BarrieGeorgeJohnBarlow兩人被委任為資深大狀，係97年回歸後最少數目。終審法院首席法官李國能主持典禮時話，今年只係收到11位大狀入紙申請做資深大律師，比正常少6、7個人，而上年獲委任嘅比率有五成多，今年就得18%，創10年新低。
八方聽啲大狀講，今年咁少人申請做資深大律師，可能同香港回歸10周年有關，唔係啲大狀唔鍾意回歸，相反係佢哋驚今年太多人申請做回歸10周年資深大狀，驚競爭大，所以人人唔敢入紙，點知反而冇乜人申請，好冷落。54歲嘅Barlow同58歲嘅包毅成擅長商業訴訟，兩個都好老資格，今次成為回歸10周年資深大狀，實至名歸。