因為有一個非一般的惡媽姚煒，趙式芝身上看不到一般名人第二代的驕縱、野蠻，為教育女兒要有禮貌，姚煒曾因為阿芝不肯叫長輩，當眾掌摑女兒，她說自己確實重手了；而在媽咪眼中倔強又善良的阿芝，一樣很「重手」，在這個母親節送上鑽錶以答謝媽咪令她懂得守時的重要。 撰文：張止寒
久違了的姚煒，仍保持S形的高䠷身材、一頭又長又曲的烏髮，伴隨着濃得化不開的女人味，隨意撥一撥髮，一舉手、一投足，都叫人挪不開視線。記者一直覺得趙式芝長得像父親趙世曾，但當亭亭玉立的阿芝和母親梳着相近的髮型一起從電梯步出來時，才驚覺兩母女如此的相似，活脫脫像一對姊妹花。
（記：記者 煒：姚煒 芝：趙式芝）
記：聽講姚煒係好惡嘅媽咪？
芝：惡，佢惡全世界都知啦！
煒：應該話我係嚴肅、嚴格。佢咁反叛，唔惡啲點得呢？
芝：媽咪成日話我慈母多敗兒，唔識教狗。
煒：就算養隻狗都要教佢乜嘢可以做，乜嘢唔可以做，狗要train，人就要教。
芝：所以我細細個時，佢打到我開花。
煒：邊度開花？頭髮開花呀，唔好亂噏喎！
芝：佢打我嘅題材好有創意㗎，其中係一支好粗嘅筆，佢喺台灣拍戲時買嘅，本來買嚟送畀我做禮物，後來就用咗嚟打我。
曾掌摑女兒
煒：因為佢俾我發現話做功課，原來喺度睇電視，咁我咪攞支筆一嘢扑落佢個頭度咯！
芝：我仲記得當時睇嘅係《IQ博士》，嗰陣好細個，得一、二年班，其實我多數唔記得自己做錯過啲乜，只係記得受嘅懲罰係乜。
煒：由細到大我不斷提醒佢，做嘢之前要諗清楚究竟啱唔啱，等佢做錯嘢會驚。
芝：我知道媽咪養大我好辛苦，為咗我做咗好多犧牲。
煒：我又覺得養唔係乜嘢大件事，最重要係點教。佢細細個嘅個性好倔強、驕傲，我一直教佢要有禮貌，要叫人，有一次我嗌佢叫auntie、uncle，佢竟然當耳邊風，我叫咗佢三次，卒之忍唔住一巴摑埋去，當時我就覺得自己手重咗，但係摑完佢又叫喎，點解要懲罰先至肯做呢？係咪蠟燭呢？(上海話「蠟燭」意指不點不亮，比喻不給點厲害就不知好歹之意）之後佢開始有轉變，好多朋友都話覺得佢有禮貌。
芝：媽咪嘅教育方法好特別，佢好狠，覺得啱就會做。
煒：都唔係啱唔啱嘅，當時我覺得冇面，叫你叫人都唔叫，事後我都覺得喺人哋面前咁重手，唔係咁好。
畫波子做禮
芝：我細個成日聽人哋講話「GiGi（趙式芝），你𠵱家唔明，大個就會明」，其實我好唔忿氣，乜唔明呀！到大個出嚟做嘢，見到同齡嘅人有好多壞習慣，明顯係屋企寵壞咗，我會好反感，呢個時候會識得諗番好彩以前媽咪咁嚴格。
記：點解送錶畀媽咪做母親節禮物？
芝：其實我有諗過送波子，記得細個媽咪話想要架波子，我聽到佢同uncle嗌交時話「你追我時又話送架波子畀我，結咗婚又冇送」，嗰年我畫咗架波子送畀媽咪。
煒：佢畫嗰架波子好靚。
芝：𠵱家出嚟做嘢，叫做搵到啲錢，我有諗過送波子，但係媽咪𠵱家大部份時間喺上海，如果揸車，我又會唔放心，送波子唔係太適合。媽咪係時間觀念好重嘅人，佢成日叫我唔好遲到，所以我送錶畀佢。我知佢鍾意Leonard呢個牌子嘅表，之前佢自己都買過一隻，今次我送畀佢呢隻，全世界得50隻，香港係唯一嘅一隻，加上表面係我自己設計，特別有意義。不過正式訂做嗰隻，要三個月後先送到畀佢。
煒：一個人嘅形象係點，好多時要用錢去堆砌，但準時呢樣嘢唔需要錢，同時又唔難做到，係對人對自己嘅一種尊重。如果你約咗總統，你敢唔敢遲到呀？
怕捱壞身體
芝：我𠵱家已經好自律，不過時間觀念就仍然冇媽咪咁強。
煒：我希望佢生活正常啲，佢𠵱家搞公關公司成日時間顛倒，我最擔心佢會捱壞身體。其實我呢個女雖然倔強啲，但心地好好，令我最感動嘅係佢去英國讀書第一年嘅暑假，佢去咗非洲做義工幾個月，返嚟時由130幾磅瘦到得番90幾磅，我去機場接機時都唔認得佢，當時真係眼淚在心裏流。以前我用把口教佢，但對佢嘅關懷都放喺心入面，好少喺言語當中講出嚟，但𠵱家就唔會好似以前咁push佢，我知道佢大個咗，識諗咗，同佢講嘢都會婉轉啲，收斂啲，唔會一插就插中要害。
記：你會唔會考慮復出拍戲？
煒：其實之前喺上海都有內地電視劇搵過我，但係我覺得個劇本冇發揮，咁耐冇拍戲，我唔想做一個有冇我都得嘅角色。
攝影：陳慧安 場地提供：Baci 服裝提供：Leonard
