長城科技（074）旗下A股上市公司長城電腦（000066）於周四突然停牌，惟長科卻要等到噚日先至停牌，通告話，有待該公司發出有關一項主要交易事項之通告。假如今次長科停牌係同長城電腦有關，再一次反映中港兩地欠缺停牌制嘅溝通機制，情況一如舊年上海石化（338）的混亂情況。
據報載，持有冠捷科技（903）2.24億股或11.55%權益的內地上市公司京東方（000725），可能會將所持冠捷股權，悉數售予長科旗下A股公司長城電腦。京東方連續兩年虧損，再蝕多一年就會變ST股，要喺次一等市場買賣，價值會差好遠，因此急於出售冠捷套利，而今年1月公司已沽過一次貨畀大行。
可能係呢個潛在沽家影響，冠捷股價跌足年幾，相信呢個潛在沽壓解決之後，對股價會有正面刺激。另一方面，長城電腦喺國內係數一數二嘅電腦硬件生產商，變成冠捷策略股東後，或有協同效益都未定。
宏安拆細前先發輪
至於已停牌個零星期的宏安（1222），據通告講係擬發行認股證，睇番該公司較早前所發出之通函，集團於本月17日舉行股東特別大會，及於18日拆細股份正式生效及買賣，剛好喺呢個拆細股份之敏感時候發輪集資，時間上真係好「配合」。該公司已將目光放於國內，大搞農副產品批發市場，或因此有集資需要，但係要作大額集資，上市公司多數會揀配股而非發輪，故此有乜目的，好視乎配幾多輪同配畀邊個。