恒生銀行首次贊助兼舉辦嘅「從奧運看中國」國情教育活動，50個14至18歲香港學生，上個月浩浩蕩蕩去北京考察咗6日，了解奧運籌備工作兼遊覽。噚日舉行滙報，恒生大班柯清輝亦跟同學分享自己嘅年少往事。
話說柯大班11歲跟媽媽從福建落嚟香港，之後足足16年未出過埠，唔似班同學仔咁，年紀輕輕已經可以周遊列國。柯大班直到1974年，做咗滙豐銀行Trainee先有機會出國，不過並唔係旅行，只係被派去南太平洋嘅小島實習半年。
當時交通冇咁發達，冇咁多直航機，柯大班隻身出門，先要飛去新畿內亞，仲要等足三日先有內陸機飛抵目的地，一去就半年，又得自己一個人，真係少啲膽識都唔得。
唔怕蝕底 顯示能力
柯大班仲透露自己事業成功嘅玄機：「唔怕蝕底」。佢話，除咗自身努力，做事都要靠啲運氣，仲要懂得把握時機，如果做嘢嗰時「唔怕蝕底」，一方面表達咗自己嘅解決問題能力高，另一方面，仲加深咗老細對你嘅認識，所以「唔怕蝕底」係成功嘅關鍵。各位同學收到未？
[email protected]