花旗股市一係唔跌，一跌就百幾點，不過，睇番𠵱家道指嘅水平，百零點都係濕濕碎，只要冇出現恐慌性拋售，就冇有怕。道指13000關好硬淨，應該守得穩。
花旗股市跌，亞洲股市梗腳軟，加埋外電報道話聯儲局前主席格老又講「美國1/3機會經濟衰退」嘅理論，淡友自然食住個勢插多兩下，但借勢嘅嘢，過一兩日又當冇嘢，做好做淡，又要睇有乜嘢新藉口。
港股前日跌咗落嚟，昨日見美股唔對路，淡友一句唔該都冇，就將恒指嘜落10日同20日線樓下，技術指標走晒樣，不過，可能係大家都覺得市底唔錯，低位有承接力，港股呢一兩日如果爬唔番上高位，相信會轉落低一啲嘅範圍波動，短線應該喺20200至20800之間舞上舞落，實際情況係點，就要睇花旗股市點走。
呢兩日仔細睇過A股啲圖，發覺指數喺高位嘅阻力開始浮現，好可能會喺下禮拜做技術調整，大家都知國內個市幾癲，升咗咁多，跌番啲都會有殺傷力，至於會唔會影響港股，影響梗會有，但H股同A股比，折讓好大，調整幅度應該有限，不過，炒賣氣氛有可能差咗啲，下禮拜炒H股，都係要小心選擇，有勢嘅可以跟，弱勢嘅就要避開。
鞍鋼C輪7395：鞍鋼（347）3月試咗低位後，4月又炒過，向上嘅勢好明顯，個市跌都影響唔到佢，睇嚟遲早會上試20元。
鞍鋼C輪7395昨收0.55元，槓桿率3.1倍（有效2.5倍），仲有203日先到期，博正股上試20元有足夠時間，正股升上20元，7395應該喺78仙樓上，正股跌穿15.80元止蝕。