屋企有老人家，煮飯嗰陣都要特別諗一諗。首要係易咬易消化，同時又要針對某啲老人身體機能衰退問題，例如視力轉弱、記性差、血液循環問題、骨質疏鬆等。今日就教大家揀啱食物煮畀老人家食，等家中之寶生活得更健康。
記者：林佩婷
攝影：陳偉強
銀杏金菇鮮枝竹
需時：10分鐘
價錢：$20/4人
材料：菜心4條、銀杏8粒、金菇1包（去尾）、鮮枝竹4両、冬菇絲/冬笋各適量、上湯21/2碗、蠔油1湯匙、鹽1/4茶匙、糖1/2茶匙、生粉/油/麻油各少許
做法：1碗上湯燴熟菜心/銀杏後，略炒圍碟邊；1碗上湯燴熟鮮枝竹加1/4茶匙糖，放碟中間。金菇/冬笋/冬菇汆水後，落油/麻油/蠔油/1/2碗上湯/1/3茶匙糖/鹽兜勻，最後以生粉打芡淋在鮮枝竹上。
知多啲：銀杏有助老人家保持大腦的健康，維他命E可延長細胞壽命，預防老人癡呆；但切記勿食過量，以免中毒！
豉味南瓜排骨煲
需時：30分鐘
價錢：$40/4人
材料：南瓜1/2個（切角）、排骨8両（切件）、豆豉10粒、薑角4至5片、蒜頭2粒（切茸）、蠔油/生抽各1/2茶匙、清湯2碗、糖/鹽各1/4茶匙、葱段/油/生粉各少許
做法：排骨用生粉/糖/鹽醃約10分鐘；燒熱油鑊，爆香薑角/蒜頭/豆豉，落排骨/南瓜炒香，加清湯/蠔油/生抽，大火滾起轉中火燜10分鐘，最後落葱段炒勻便可。
知多啲：南瓜的胡蘿蔔素對眼睛有益，老人視力不足宜吃。
家鄉煎釀玉環
需時：30分鐘
價錢：$60/4人
材料：蝦肉4両（打成蝦膠）、青豆角10條、蒜茸/亁葱粒/葱粒/紅椒茸/鹽/糖各1/4茶匙、粟粉/油各少許、清湯1碗
做法：青豆角加鹽汆水至軟身，捲成環狀，釀入蝦膠成球丸。燒熱油，煎蝦丸至7成熟備用；爆香蒜茸/亁葱粒，落清湯/蝦丸/鹽/糖煮至全熟，以粟粉埋芡，上碟後撒上紅椒茸/葱粒。
知多啲：蝦肉打成膠，老人家較易進食。
豉油皇蒜片牛柳粒
需時：10分鐘
價錢：$50/4人
材料：牛柳粒8両、蒜片1両、葱5錢、亁葱片5錢、紅椒1隻（切角）、蒜頭2粒（剁茸）、生抽1茶匙、糖1/4茶匙、油適量
做法：蒜片炸至金黃色撈起，另炒熟牛柳粒備用。爆香蒜茸/亁葱片/紅椒角/葱，落牛柳粒/蒜片/生抽/糖，煮至收亁水份。
知多啲：大蒜對老人的心腦血管有一定作用，能清潔血管及血液。
一品豆腐
需時：45分鐘
價錢：$70/4人
材料：叉燒粒1茶匙、北菇粒1/2茶匙、豆腐1件、葱花/芫荽各1/4茶匙、蝦2隻（拍成膠）、蛋白2隻、鷹粟粉1茶匙、膏蟹1隻（起肉起蟹黃）、青豆10粒、韭菜花8粒、鹽/糖各3/4茶匙、上湯1/2碗
做法：豆腐/蝦膠/北菇粒/蟹肉/叉燒粒/蛋白/1/2茶匙鹽/1/4茶匙糖/葱花/芫荽攪勻，放入預先鋪上保鮮紙的碗內，蒸15分鐘上碟。煮滾1/2份蟹黃/上湯/1/4茶匙鹽/1/2茶匙糖，以粟粉水埋芡，淋上蒸好的豆腐面。最後放上燴過的1/2份蟹黃/青豆/韭菜花粒作裝飾。
知多啲：豆腐含豐富蛋白質、維他命B1、磷、鐵等，能有效降低膽固醇。而且由於所含熱量不高，老人家吃不致吸收過多熱量而肥胖。
煮腍啲容易食
以下食物也特別適合老人家食用，不過最好煮腍一點，方便老人家進食和吸收當中營養。
西蘭花：它所含的維他命C及胡蘿蔔素可增加人體免疫力，當中的鉀質可維持心臟及血壓正常。
粟米：長期食用可降膽固醇，減輕老人斑；另當中的維他命A能促進細胞新陳代謝。
合桃：當中所含不飽和脂肪，能有效預防老人癡呆，改善記憶力。
蓮子：當中的鎂質有利老人吸收鈣，維他命C及E則可延緩衰老，纖維素則有助排出體內廢物。
冬瓜：所含的維他命B1能將物質轉化為熱能而不變成脂肪，有助老人家減肥。纖維素則可減低他們患上心血管病的風險。
示範：海景嘉福酒店海景軒（27312883）
助理行政總廚黃世賓
