淨係得Shopping行街買嘢，點會滿足到型仔型女？香港熱門蒲點，有蘭桂坊、Soho、諾士佛臺，珠海就有新興蒲點水灣路。無大假放，不如趁呢個短短的周末蒲盡啲。玩遠少少，我哋上到珠海一於殺入呢條酒吧街，玩盡當地熱爆Bar！
記者：葉雪芯
攝影：何家亮
Model：蘇菲
Red睇花式噴火調酒
水灣路酒吧街是近年珠海市新興蒲點，每晚都有唔少蒲精來這裏打躉玩樂。其中最受歡迎的可算是Red。顧名思義，紅色就係整間Bar的主題，全店的燈飾、裝修、一枱一櫈都紅噹噹，店長阿梅話：「有人話紅色危險，其實落吧玩就好似一項冒險活動咁，非常刺激！」Red最特別的是每晚都會有花式調酒表演，BarTender會又玩酒又玩火，場內不時聽到嘩嘩聲。除了花式調酒，仲會有駐場DJ打碟玩爆重音樂和WarmUp熱舞表演。Red算是酒吧街中較高消費的一間，不過有人玩「火酒表演」，喺香港又咁少見，貴少少都抵啦！
冰火$80
啲藍色火好有CoolFeel，味道飲落口有啲涼涼哋，由薄荷、橙汁和檸檬汁、Vodka調成。
烈火情人$88
一、二、三……點火！嚇死！BarTender話酒名叫烈火情人，計我話係噴火情人就真！由菠蘿汁、橙汁、檸檬汁、Vodka、Gin調成，因為火已經燒晒啲酒味，得番啲果汁，味道小記覺得好睇多過好飲，但齋睇都值回票價！
Red紅色（86-756-8188299）
地址：珠海市拱北水灣路酒吧街225號
Seven辣身女郎表演
行過兩步，見到另一間人氣熱爆嘅吧──Seven。啲人坐滿門口，墟冚到不得了。酒吧街成型大概有兩年時間，開初成條街只有兩三間夜店，𠵱家就成條街都係，當中Seven就係龍頭代表。開業無耐最近Seven又重新裝修，全幢酒吧的外牆，都是以玻璃構造，極有Cyberfeel，但又有點似溫室，單睇外貌已經好神秘。入到裏面，水銀色調為主的裝飾非常豪華。入得來玩一定唔會要你齋坐齋飲咁寡，這裏最特別的是表演節目十分多，每隔十幾分鐘就有人出來贈興，一時有辣身女郎熱舞表演，一時又有歌手獻唱。咪以為裝修豪華消費梗貴，Seven奉行薄利多銷，平均都係三、四十蚊一杯Cocktail，算是酒吧街中較經濟的選擇。
Russian$38
由俄羅斯伏特加、菠蘿汁、咖啡糖漿所調成，入口好似飲緊咖啡，到後尾先飲到強烈酒味，層次感非常突出。
DeepOcean$38
由藍橙酒、梳打水、伏特加調成，顏色最靚，不過酒精成份較重，女仔千祈唔好俾佢嘅外表吸引咗越飲越多呀！
Seven七號會館（86-756-8113999）
地址：珠海市拱北水灣路酒吧街203-209號H位
MTC霧都港人班底
酒吧街近排又開咗一間大型Club，成為全條酒吧街的勁敵──MTC霧都。這間吧，單單裝修花費已接近1,400幾萬人民幣，咁揼本，原來霧都的老闆是香港人，這裏無論DJ、Dancers都係香港人，部份更是曾經在香港著名Club如Sugar、Volar等駐場過，認真唔簡單。全場以鐳射燈主打，氣氛熾熱，值得一提的是場內設有多間VIPRoom，每間房最低消費要三、四百蚊，比起同區的酒吧多私人包廂，鍾意玩得有私人空間就最啱。
激情海灣$48
由提子汁、果汁酒和Vodka調成，甜度適中，不過酒味很少，似飲緊果汁多啲。
致命彩虹$188
由Vodka、熱帶果汁、甜酒調成，酒放在TestTube中，再插在碎冰中，一盤大約有4、50支酒，飲得晒都的確係幾致命。
MTC霧都（86-756-3836866）
地址：珠海市拱北水灣路酒吧街龍園海灣雅苑201號
當地潮人去邊間？
蓮花路$20杯路邊Cocktail
喺水灣路飲杯Cocktail，4、50蚊落樓好平常。但行多兩步有蓮花路，鄰近拱北關口，街的兩旁擺滿一檔檔撐起太陽傘的細酒吧Counter，整條路接近有60檔，好有芭堤雅風味。檔仔細細五臟俱全，Cocktail、啤酒、果汁、咖啡乜都有，每杯都係十幾廿蚊就有交易，如果係秋天/春天涼涼哋嘅天氣，坐喺度飲番杯吹吓水，都幾寫意！
