星期三寫「中大第一」，見報前後，幾位老友來電，話：「喂，你話中大第一？中大學生報有『情色版』噃，大學生學肥龍、骨精強，中大好有面呀？」
左丁山冇睇過《中大學生報》，唔知佢講乜，但從報紙報道得知，學生報講「情色」，用字甚為低俗，唔知係唔係現時嘅年青大學生慣於如此。分兩部份講，第一，大學生有言論自由，寫乜都得，但係題材盡可廣泛，品味不可粗鄙，用字不應粗魯。社會對大學生總有期望，大學生寫文寫到好似一啲冇讀書嘅粗人，總與大學生形象不符。
第二，如果聲稱有為而來，旨在引起社會討論性問題嘅話，睇吓內容先。一位記者傳來《中大學生報》關於情色版文章（呢位記者話學生報其他文章仍然好正經，寫得唔錯。）畀左丁山睇，睇完嘅感覺係攞嚟講，冇引起討論嘅價值，幾似《閣樓》一啲所謂「讀者來函」或者《姊妹》啲性信箱（唔知《姊妹》是否仍然在世呢？）。
睇吓睇吓，學生報「情色版」無甚高論，若出現在打正旗號，話明講色情嘅《蘋果》豪情版，一定冇人理，冇人向Tela投訴，但在《中大學生報》出現，先至會引起社會驚奇。假如將「豪情」版故事放在《明報》文化版，你估《明報》讀者會有乜反應？
老友問及「情色版」會否影響中大校譽，唔會啩？一間大學聲譽主要靠（一）教授研究水準及其學術聲譽，（二）畢業生在各行各業之表現是否出色（即大學產品是否有質素）。以呢兩個標準衡量，中大在香港嘅大學之中，完全唔輸蝕。至於個別學生文章在學生報出現，引起投訴，只會係暫時性，唔會抹黑大學聲譽，哈佛耶魯出現學生色情網頁，對呢兩間大學不會動搖分毫。學生在校時，盡可反叛、出位，一到畢業，就希望佢哋growup，無論從事邊一行，都希望佢哋做得好，能夠負起責任。入到社會而繼續反叛，罵東罵西，咁又點呀？都好啫，要做到對社會有impact噃，唔好閉門扮反叛，視自己為滿懷熱血，懷才不遇，社會欠咗佢呀！