昨日講到亞洲協會搵諾貝爾獎經濟學得獎者RobertMundell演講。大師講人民幣匯率，以前聽過嘞，就係反對人民幣升值，反對人民幣自由浮動。呢點大家都好熟悉，尤其是經濟學界人士。
另外一點就好似未聽過，據經濟師Ｅ與經濟師Ｋ分析，蒙代爾認為中國人民銀行唔應該發行人民幣債券/票據嚟吸收市面人民幣（呢個過程叫做sterilization，即係消毒，清除咁解），比較令人奇怪。目前中國外匯儲備約一萬二千億美元，每個月平均增加一百五十億至二百億美元，到○七年年尾，外匯儲備會達到一萬四千億美元以上，估計有多冇少。
因中國實行外匯管制制度，所有外匯流入，都要上繳人民銀行，取回人民幣。換句話說，外匯流入愈多，人民銀行發出嘅人民幣就愈多。貨幣供應增加得快，據佛利民理論，通脹一定上升，所以好多有外匯管制嘅國家都為咗消除貨幣供應急升嘅現象，喺買入外匯之同時，賣出債券，變成左手送出人民幣，右手收回美元，跟住袋好美元之後，左手發行債券，右手收番人民幣，當然未必係收一蚊美元就發七個幾人民幣啦，會有少少差別嘅。
𠵱家蒙代爾建議人民銀行收了美元之後，唔好發出債券，咁樣咪會發生通脹？蒙代爾話唔一定，因為企業、人民口袋中多咗人民幣之後，以中國儲蓄率之高，一定會儲蓄起唔少，但市面銀紙多咗，應該會增加消費，增加舶來品嘅輸入，減低外匯盈餘，令人民幣升值壓力消除。
經濟師Ｅ認為蒙代爾之建議比較有風險，人民銀行為確保萬全，唔敢輕易採用。目前中國已經有太多資金追逐太少股票嘞，假如人民銀行唔發債券收回人民幣，減慢貨幣供應，股市會唔會更加瘋狂？一位教授話中國GDP有二十三萬億元人民幣，深滬股市總市值未夠十五萬億，只係GDP之65%，而香港股市市值超過十四萬億港幣，與GDP係約莫一對一，中國股市仲未見癲到瘋狂狀態。