打工仔咪以為做老闆好過癮，其實家家有本難唸的經，網友夜色闌珊就喺《天涯社區》鋪咗老闆八大苦況。
抉擇之苦
企業做到一定規模，老闆當然會好風光，但隨後企業發展方向點抉擇，呢種思考痛苦，唔係打工仔可以理解。所以企業越大，風險越高，犯錯機會越大。
親情之苦
老闆要由朝做到晚，中午要開會陪客食飯，夜晚仲要去應酬，有時比普通打工仔仲要辛苦幾倍。返到屋企，老婆仔女都瞓晒覺，搞到夫婦子女關係疏離。仲有機會為錢同親人反面。
身體之苦
好多老闆除咗工作諗嘢要快，仲要識陪人交際應酬，到頭來，唔單止搞到大肚腩、甩頭髮、個樣殘晒、周身病痛，身體要為工作付出沉重嘅代價。
孤獨之苦
咪以為老闆嘅交際圈子好廣，其實只係表面風光。同政府官員打交道要小心翼翼；同家人親人關係，隨時因為少溝通而有裂痕；原本一齊創業嘅好友，都可能會因財失義。仲有好多重要嘅商業秘密，唔可以同屋企人或朋友講，即使係老夥計都係咁話，有苦自己知。
財富之苦
好多老闆，有錢比冇錢痛苦。特別係中小企業嘅老闆，考慮自己人身安全，買同着嘅都唔敢咁放。亦有老闆，每逢新年過節都怕怕，驚隨時有人上門敲詐。
安全之苦
有邊個做老闆嘅唔得罪人㗎？所以，好多老闆都擔心自己安全，甚至乎喺屋企都要搵保鑣傍住，令自己無法享受多姿多采嘅生活。亦有老闆唔敢同仔女一齊玩，怕俾人點相、綁架；佢哋將子女送到貴族學校，其實唔單止考慮學校嘅良好教育環境，更重要係因為夠安全。
心理之苦
珠三角嘅老闆圈子流行一句話：老闆唔係人做嘅。中國嘅老闆，特別係中小企業嘅老闆，無論人際關係同心態，越嚟越唔正常。好似有啲老闆鍾意包二奶、賭博甚至吸毒，某程度嚟講，可能係宣洩長期以嚟受壓抑嘅生活，以金錢換取快樂，麻醉痛苦。
責任之苦
邊個都可以死，做老闆嘅點都唔死得。無論大大小小嘅老闆，總有幾百人、幾千人甚至幾萬人等住佢開飯，如果佢嘅離開令到間公司執笠破產，咁好多人都要重新搵過工。
http://www.tianya.cn/publicforum/Content/develop/1/98284.shtml