人到咁上下年紀，特別鍾意緬懷過去，身為全球任期最長央行行長嘅金管局總裁任志剛，親身經歷香港金融史詩上，一幕幕有血有淚經典場面，寫十本八本回憶錄都唔夠啦，佢噚日喺至愛專欄《觀點》繼續懷舊，重溫83、84年間，聯滙設立前後嘅點滴，包括當時高官學者、輿論界翹楚發表嘅高見。
華華覺得成篇文章，牌面係聯滙軼聞，但就好似古龍小說咁，佢最想講嘅謎底，其實係全文尾二段嗰幾句，「到了1988年7月，經取得各方同意後，新的會計安排終告落實，這才讓政府可以間接地控制貨幣基礎。」
新會計安排呢家嘢，講真冇乜邊個明，據講當時亦只有一張本地財經報紙，號稱香江第一健筆嘅猛人，喺社論度一語道破，話政府暗度陳倉，成功喺滙豐手上，攞返港元最終拆借權嘅半央行角色。任總同其他財金高官，遠赴英倫銀行力陳利害嘅一幕，相信會永誌任總心中重要席位。
[email protected]