聽日是母親節，有冇搞錯要食阿媽落肚咁忤逆？非也！其實食佢落肚都係為咗佢身體好，點解？因為有某些食材食乸唔食公會更加美味，而且有補身功效。今日搵嚟幾款菜式，淨係食晒啲乸落肚，一於聽日帶埋阿媽擦番餐勁，幫阿媽以形補形呀！
記者：梁學文
攝影：陳陶鈞
Model：Emily
帝皇雌蟹膏多肉爽
中國人成日都有句說話：「食補優於藥補。」新開業的媽子廚房深明這個道理，主打健康家庭菜。每日提供最少2款老火湯，媽子Helen話：「我哋會提供代客煲湯服務，只要早6個鐘搵我哋，就可以幫你煲一煲老火湯。」簡單的青紅蘿蔔湯，至做法複雜的南北杏五指毛桃煲豬肺都冇問題。另外，仲會提供私房菜服務，Helen話近排帝皇蟹當造，尤其雌蟹膏多夠鮮甜，提早訂菜就有得食。其中最體貼的服務，是客人可以買完菜搵媽子廚房煮都得。3種服務夠貼心，彷彿有個大眾「媽子」服侍大家。
冰湖帝皇蟹$198/1kg
來自智利的帝皇蟹平均重2-3kg，凍食蟹腳最好味。用上多膏的雌蟹做，蟹肉夠爽。其實一蟹可以4食，先來個凍蟹，然後就焗蟹蓋，跟住蟹肉炒飯，最後來多個瑤柱蟹肉羮都得，不過要另收加工費。
媽子廚房（28330098）
地址：銅鑼灣軒尼詩道428號友光大廈1樓
營業時間：11am-12mn
乸花膠湯更易吸收
乸花膠同公花膠最大的分別，就是乸的身形較圓潤短身；公會較尖。明閣的曾師傅話：「公花膠質地較硬，要煲耐啲至夠腍，但乸就易啲煲得腍，且入口柔軟，食落都易啲吸收。」花膠含有大量骨膠原，對於易出現骨質疏鬆的女性來講，絕對是恩物，加上乸花膠比公更易讓人體吸收，下次食花膠，記得揀乸喇！
菜膽花膠北菇$118/位
用燉湯方法做，花膠入口夠腍，而且吸收了冬菇的味道。
明閣（35523300）
地址：旺角上海街555號朗豪酒店6樓
燒龍蝦乸多層膏味
唔鍾意食中菜，去TheBackyard食燒烤一樣得。當中的燒紅龍蝦就是用菲律賓雌紅龍蝦做。師傅話用雌龍蝦烤起來會多層蝦膏味，更加鮮甜。
炭燒紅龍蝦
師傅只將鹽和黑椒，撒滿新鮮的龍蝦面，然後去燒。燒完一陣炭火味，入口彈唔彈牙都是次要，最重要是蝦肉夠鮮甜，而且蝦肉多又爽，雌龍蝦果然味道比公龍蝦好。
TheBackyard（35523300）
地址：旺角上海街555號朗豪酒店5樓
自助餐價錢：成人$348、小童$218
食魚春夠補身
雖然魚子未大就唔知是公是乸，不過都是從母親來的，含有大量Omega3、維他命D，有助預防骨質疏鬆。食阿媽落肚，無非都是想媽咪可以補補身，食魚子都一樣可以補得到。
三文魚子沙律$80
三文魚子配凱撒沙律汁，酸酸哋夠醒胃，而新鮮三文魚子味道鮮甜，還有大量Omega3，好味又有益。
飯廳（26280636）
地址：荃灣青山公路388號中染大廈地下
營業時間：7:30am-12mn