去紐約高級扒房食晏要成483萬蚊港紙？冇錯！而且食咩扒唔重要，關鍵係有股神畢菲特陪坐陪食，同佢分享投資心得，分分鐘仲有機會成為佢嘅接班人㖭！
步步高創辦人段永平舊年喺eBay嘅慈善拍賣以62萬美金（約483萬港紙）高價，贏得同巴郡主席、股神畢菲特共晉午餐嘅機會。段永平噚日同7位貴賓與股神午膳，席間大家可以暢所欲言，只係唔准問股神嘅投資買賣。
與股神想法好接近
飯後，大家仲互送高帽，富豪段永平對股神讚不絕口，股神亦盛讚段永平好識得關懷別人。咁到底撐咗3個幾鐘枱腳之後，有咩得着呢？
段富豪話佢哋無所不談，除咗傾吓點樣揀人才、教細路同捐錢之外，股神仲分享咗自己對某啲行業嘅睇法、從錯誤中吸取到嘅教訓，總之就獲益良多。
自01年移居美國，段富豪話睇咗好多有關投資嘅書，但多數講短線獲利、技術性分析之類，唔覺有咩得着，直至佢睇咗股神寫畀股東嘅信之後，即刻茅塞頓開。佢尤其認同股神話買一隻股就如買咗成間公司嘅投資理念。
會面之前，段永平話好想請教股神，如果喺未搵到好嘅投資目標之前，點樣先可以避免做出錯誤嘅投資；𠵱家已經搵到部份答案，原來股神話當佢相信自己遲早都會好有錢嘅時候，就唔會咁急進。
段永平仲話，原來佢同股神想法差唔多。咁佢咪好有機會做股神接班人囉！
[email protected]