噚日長江生命科技、港燈同長江基建齊齊開股東會。之後，三間公司嘅高層都有同記者見面。第一個見記者，係長江生科嘅總裁兼行政總監甘慶林，佢第一時間就話今次股東會反應好好，有超過300個小股東出席。
雖然人多，但反應唔算踴躍，小股東一個提問都冇，甘慶林笑晒口話，相信係因為06年業績好，營業額升咗2.16倍，有21.97億，盈利仲暴升7.34倍，賺咗1.02億，相信小股東都好滿意。
記者非常關心有傳聞指「長建系」會進行重組，甘慶林朝早就話「今日呢分鐘冇呢個考慮」，到咗下晝小超李澤鉅見記者，被問到時佢一頭霧水，話要問番甘慶林有冇講過㖭。
雙方早有淵源
咁小超應該知老竇「第三個仔」李嘉誠慈善基金，有份入股網上電視服務網站Joost啩？李家對傳媒業似乎好有興趣。單刁由紅杉資本（SequoiaCapital）牽頭，拉埋李嘉誠基金會在內共五間機構，夾份注資4500萬美金（即3.5億港銀）。
華華係唔明，Joost揸fit人係網絡電話工具Skype創辦人，Skype同Tom在線係業務夥伴，Joost同李家叫得上有啲淵源，超人慈善基金同TOM集團都係由周凱旋話事，對呢單刁有冇影響呢？
[email protected]