8,000呎Clubbing，喺豆腐膶咁細嘅香港，要搵真係難過登天。紐約StreetFashion品牌TripleFiveSoul最近在珠海新開設全球大型旗艦ConceptClub「Rude」，佔地夠晒大不特止，除了係服裝店之外，仲將餐廳、Disco、Bar多功能集於一身，話晒8,000呎，要行晒唔係易事，即刻同你解構！
記者：葉雪芯
攝影：何家亮
Model：菲菲、文仔
專門店──工業粗線條
「Rude」分為5大部份，入大門口左手邊是TripleFiveSoul專門店，售賣除了有這個元老級紐約街牌外，仲有旗下的副線Subscrib。單是這一部份已經佔成近二千呎，等於一間香港百貨公司咁大，不過地方大唔玩貨多反而玩簡約，店舖兩旁設置了時裝架，空間感十足。店舖室內設計似藝術館，由裝修至擺設，都係由美國鬼才室內設計師QuiN.Ly操刀，大玩原始街頭風格和粗線條工業設計，以鋼、鐵、木頭、石屎牆為主，建材唔玩高貴料，但就夠晒Raw。係，香港都有TripleFiveSoul專門店，不過話明係全球大型旗艦店，今季就特別推出了一系列只限珠海地區售賣的LimitedEdition，擺明係偏心少少！如果你係佢Fans，無計，惟有上來掃貨！
珠海限定系列逐件睇
餐廳──睇海景食飯
掃完貨，店的右邊正是Rude的中心地帶──Cafe餐廳。與專門店的街頭風格相比，這裏氣氛悠閒舒適，唔似一般的餐廳咁又逼又窄。餐廳分兩個主題，一邊係長餐枱同梳化，餐枱唔多，旁邊的落地大門可以全面打開，睇住海景食飯，人都開胃啲。在餐廳的正中央位置，QuiN.Ly設計了名為「Landscape」的高台，台上擺滿了DesignerChair，部份由他親手製造，獨一無二，坐喺高台上，Leisure得來高高在上，夜晚仲會有DJ打碟，跳舞開Party都得。餐廳的菜式雖然無特定國家的菜式做主打，但奉行「正宗主義」，全部都由香港廚師主理，主廚Mike：「呢度最特別就係轉菜單比人快幾倍。以前喺香港，一個月都轉唔到一次菜單，但Rude就起碼一個月轉兩次，比起香港一些頂級酒店仲密，保證客人每次都有新鮮感。」
夜晚變身Bar&Disco
入夜，Rude由餐廳/專門店即刻化身成Bar&Disco，除了餐廳部份會變成大舞池外，餐廳的另一邊更特別設一間名為「眼睛」的DiscoRoom，每晚皆有駐場DJ捽碟。DiscoRoom特設了一間全紅色絨布牆的VIPRoom，樓底特別高，兩盞懷舊水晶燈做裝飾，格調Glamour。房內隔音設備非常好，即使裏面開爆機嘈到坼天，外面都唔會受到影響，開私家Party想點玩都得。
獨創五香酒SpicedMijito
五香肉丁你食過，五香酒你飲過未？有薄荷酒、五香味Rum酒、青檸和梳打調成，味道有點辛辣。
Rude（86-756-8881770）
地址：珠海市拱北情侶南路日華花園263-267號地下B區