歐洲賽
未計禮拜四戰果，由第5位嘅愛華頓至11位嘅阿士東維拉，都會為歐協盃資格打崩頭，雖然大部份涉及場次都冇直播，一樣有「睇」頭。
維拉願助熱刺一把
曼、車喺國內聯賽盃賽玩晒，搞到英超頭7名都踢到歐洲賽。呢條戰線，愛華頓分數多而得失球最好，除非無厘頭俾車路士大炒，否則個歐協盃位冇走雞。雷丁同樸茨茅夫要贏又要望競爭對手失分，「老樸」有好幾個前阿仙奴兵，唔知禮拜對手「兵工廠」會唔會賣個順水人情呢？
第11位嘅維拉得49分，無可能上前7，爭乜鬼？錯嘞，維拉喺英超公平競技榜排第2（主要計紅、黃牌數同埋球證評語），只落後俾熱刺，而假如熱刺得前7名就益到維拉，令維拉順理成章代表英超同其他國家代表抽籤，爭個走後門踢歐協盃嘅資格。換句話講，維拉作客贏保頓會間接幫到熱刺，亦即係幫自己。