車路士日前作客被阿仙奴迫和，衞冕英超宣告失敗。呢場波賽後話點，基本上都去晒曼聯再度封王身上，其實個「讓球」盤口，都值得同大家研究一下。
周日阿仙奴主場對車路士，「讓球」及其他項目，早於上周五已開始受注，當時盤口係平手盤，車路士低水。由於當時車路士喺聯賽尚有反先曼聯嘅希望，莊家喺呢個平手盤上面，稍秤先車路士亦無可厚非；但對手始終係今季主場只輸過1場嘅阿仙奴，又係同市打吡，車路士真係咁值得被睇好？相信只係莊家順應球迷一廂情願嘅心態，去造出迎合調整。
結果曼聯喺早一日作客擊敗曼城全取3分，令到車路士更加需要喺周日贏波，保住些微爭標希望；但賽日盤口就竟然係阿仙奴越被睇好，先由高水變低水，臨場仲要讓車路士平/半。
賽日出擊方為上策
「讓球」無論盤口如何，最緊要係睇好賽日低水嗰瓣。記住係賽日，因賽前一、兩日或以上出現嘅水位係唔足信，試諗下有幾多投注人士，會喺早一、兩日已經向呢場波出擊？結果阿仙奴打和車路士1:1，賽日吼平手盤低水嘅阿仙奴，有睇場波都應該定過食咗定心丸；臨場至出擊最後變成受讓平/半嘅車路士低水下盤的話，真係有盈利㖭！文：華度