今季英超喺禮拜日母親節煞科，場面一定唔溫馨，各路人馬會喺呢個同時間開波嘅比賽日為留級、爭歐協盃入場券等資格殺得天昏地暗……，得到第38輪比賽後應得嘅「審判」。文：藍鑽石
護級戰：錫菲聯韋根生死戰
兩年前西布朗喺煞科日前由包尾，到最後唔使降班，嗰幕《勝利大逃亡》實太精采，可能因為咁，大家都期待今季護級又出現戲劇性發展。家陣護級形勢係3隊只能活兩隊，好清晰，錫菲聯迎戰韋根會當盃賽決賽咁踢，錫菲聯唔輸波就會踢韋根落英冠，輸波就大件事，到時要靠曼聯幫一把砌低韋斯咸。
錫菲聯喺當日會着新波衫出場，呢件新戰衣，唔知會唔會幫佢哋轉運，一洗上場吞維拉3蛋嘅頹風。不過講到衰，點計都唔及韋根連續3場波捧蛋咁衰；喺今年1月由錫菲聯加盟韋根嘅「轉倉馬」安斯禾夫，希望韋根今場贏而兩隊都留級，言則有信心曼聯會贏韋斯咸，有冇咁理想先？
今年真係曼聯年，爭標關佢事，下季升班兩隊（新特蘭、伯明翰）都係「曼聯系」，估唔到連護級舞台都踩場。雖然曼聯領隊費格遜自稱同3支護級隊嘅領隊都有交情，唔想順得哥情失嫂意，最好方法就係去盡，但費Sir咁講啫，要去都留番5.19同車路士爭英足盃啦；再講，當日奧脫福球場一定好似開party咁，賀封王兼煞科，冇理由想令訪客傷心，大家happy嘅可能性似乎都幾高……。
3條直播戰線
錫菲聯vs韋根
直播：有線61台
有乜睇：護級「決賽」
曼聯vs韋斯咸
直播：有線63台
有乜睇：1.曼聯「放水」讓韋斯咸？
2.C朗力追杜奧巴求大三元
車路士vs愛華頓
直播：有線64台
有乜睇：1.杜奧巴為神射手獎落場？
2.愛華頓求「免炒」攞歐協席位
註：全部為香港時間
周日（13/05）10:00pm開賽