曼聯捧走今季英超冠軍，但估唔到「紅魔」身家咁厚，原來咁鬼孤寒，聽聞班球員攞到嘅總獎金只得100萬鎊（約1,500萬港元），平均分得雞碎咁多！話晒都重奪失落3年嘅聯賽冠軍嘛。
費Sir畀料要捧米蘭
今次「紅魔」奪得聯賽錦標，可以分到最多獎金嘅係基斯坦奴朗拿度（C朗）、朗尼同里奧費廸南，因為獎金係以出場次數計，上述3人大約每人分到68,000鎊。咁就死啦，C朗閒閒地周薪成十幾萬鎊，但獎金只得周薪一半左右，點算獎勵球員？人哋利物浦如果贏歐聯，每人都有10萬鎊獎金啦。講開C朗，佢今季真係紅透足球壇，聽講最近有個英國女仔喺葡萄牙失蹤咗，於是C朗就喺電視台公開呼籲，叫啲人如果有嗰個女仔消息，就盡快聯絡警方，人紅真係咩都關佢事。
至於曼聯喺歐聯4強俾AC踢咗出局，費Sir講明會力撐對手捧盃，仲暗示可能會投注多少。點解費Sir咁撐AC場？原來4強次回合之後，安察洛堤送咗支極級靚酒畀佢，後者仲話等AC捧走冠軍先開嚟飲喎。