亞洲協會（AsiaSociety）遲到五月三號先至搞春茗（SpringGalaDinner），當然係要等到有大人物做演講嘉賓先搞，呢晚喺君悅酒店大排筵席，君悅宴會廳啲枱擺到幾乎水洩不通，好擠逼。如果我哋擺酒有咁多圍，埋單計數就要幾十萬銀冇找。但亞洲協會有面有力，想參加春茗呀，畀錢啦！各大公司紛紛磅水，睇怕亞洲協會呢晚籌款籌到百幾二百萬。
左丁山以賓架Ｗ嘅客人身份出席。賓架Ｗ間公司素來支持亞洲協會，呢晚出五萬蚊買一張枱，唔話得喇啩？出五萬買嘅好似有十間公司，例如和黃、東亞銀行、渣打、新鴻基地產、AIG等等，仲有八間公司出錢更多（白金贊助），有九倉、中信泰富，及大馬主施羅夫先生等。施羅夫先生隻「飛馬王子」聽聞以一百萬美元買返嚟，喺五月一日第一班千四米，一出即勝，得到額外獎金六十萬元。有人或者唔知施羅夫先生係邊位，聽過律敦治醫院未？律敦治就係施羅夫先生嘅外父，中環都爹利街嘅律敦治中心就係佢哋家族嘅。
陳啓宗係亞洲協會香港協會主席，面子十足，由佢「打心口」籌款，逢打必中，（連《華爾街日報》評論版都做埋「銀贊助」），可見陳啓宗幾巴閉。左丁山諗起呢晚入場之時，畀人拍咗一下，一望，原來係肥佬黎，但眨吓眼就唔見咗佢，唔通係WSJ嘅客人？做報紙評論版做到世界出名，觸動傳媒大王梅鐸神經嘅，WSJ第一。梅鐸要以高價每股六十美元一股收購杜瓊斯公司，外電講主要原因之一就係睇中《華爾街日報》（WSJ），特別係WSJ嘅評論版，因為呢版嘅言論（包括社論）好啱梅鐸胃口喎。我哋有一國兩制，WSJ係一報兩制，記者寫稿講世銀總裁沃爾科威茲（Wolfwitz），踩得幾盡，但評論版社論就大力撐住沃爾科威茲，如果讀者唔知道WSJ嘅編輯傳統，會以為WSJ內部分裂㖭。講番這位演講者，就係1999年諾貝爾經濟學獎得獎人RobertMundell，講題係「國際金融制度反思」，主題曲係講中國。聽日再寫。