好多人每日必追星座運程，信喜不信憂，旨在滿足吓八卦心理。其實星座除咗可以話你知有冇桃花橫財禍褔之外，仲可以啓發你今晚煮乜餸，咁神奇？據占星師講，每個星座都分別代表人體一個較弱的部位，特別容易出現問題，須要多加注意，既然知道邊度係自己弱點，當然要對症下藥，煮番味餸補番吓啦﹗
記者：趙珮倩
攝影：楊錦文
子蘿炒牛柳
需時：10分鐘
價錢：$26/4人
材料：酸子薑8片、牛柳4両、椰菜花/紅椒各1/2個、菠蘿2片、葱少許、蒜茸1茶匙、薑3片、豉油/豆粉/糖/鹽/胡椒粉各1/3茶匙、雞湯1杯
做法﹕牛柳先以豉油/豆粉/糖/鹽/胡椒粉略醃，煎至八成熟備用。紅椒/菠蘿切粒；椰菜花洗淨以雞湯/鹽烚熟上碟。起鑊爆香蒜茸/薑，落紅椒/菠蘿/酸子薑/葱略炒，再加牛柳兜勻後上碟。
★乜星座啱食：水瓶、獅子
水瓶座的朋友血液循環較差，特別容易手腳冰冷；獅子座的人則心臟血管稍弱，食薑有助血液循環，促進人體新陳代謝。
唐芹蝦膠釀豆腐
需時：15分鐘
價錢：$25/3人
材料：豆腐2磚、蝦仁8両、唐芹1束（切碎粒）、葱/紅辣椒絲少許、鹽/胡椒粉/生粉各1/4茶匙
做法：蝦仁去腸剁碎，加入葱/紅辣椒絲/唐芹/鹽/胡椒粉/生粉撻成蝦膠，釀入豆腐蒸5分鐘，最後放上唐芹葉點綴即可。
★乜星座啱食：雙子、雙魚、山羊
呢三個星座的朋友特別容易扭傷手腳，多食含鈣質的食物可以強化骨骼，豆腐和芹菜都是不二之選。
三文魚骨迷迭香
需時：45分鐘
價錢：$25/2人
材料：三文魚骨1件、迷迭香1小束、提子亁/蜜糖/日本芥辣/辣椒絲各適量、鹽/胡椒粉各1/4茶匙
做法：三文魚骨浸鹽水10分鐘瀝亁，下鹽/胡椒粉/迷迭香醃15分鐘，放已預熱焗爐以300℃焗20分鐘，掃上蜜糖，鋪上提子亁/辣椒絲點綴，吃時可蘸日本芥辣。
★乜星座啱食：白羊、處女
白羊座性格急躁，而處女座又容易精神緊張，迷迭香可以活化腦細胞，舒緩緊張，激勵情緒。
蟹子魚翅冬茸羮
需時：40分鐘
價錢：$30/2人
材料：冬瓜11/2斤、冬菇2隻、蝦米8至10粒、即食蟹子魚翅2湯匙、雞湯330毫升
做法：先將冬瓜去皮刮肉切細粒壓成茸；冬菇/蝦米浸腍後與冬瓜茸一起放入鍋，加入雞湯滾20分鐘，最後鋪上蟹子魚翅即可。
★乜星座啱食：巨蟹、人馬、金牛
易肥、腿粗、水腫係呢3個星座的特徵，食冬瓜可利尿去水腫，有助收身。
士多啤梨栗子凍
需時：2小時
價錢：$20/2人
材料：栗子肉1/2斤、士多啤梨3粒、忌廉適量、牛奶/水各3湯匙
做法：先將栗子烚20分鐘至熟後壓成茸，加入牛奶/水煮5分鐘，待涼後放入雪櫃11/2小時，取出放上士多啤梨及唧上忌廉即可。
★乜星座啱食：天秤、天蠍
天秤座的朋友要注意腰腎健康，食栗子能補腎健胃，滋補活血；而士多啤梨的營養素易被人體吸收，特別適合腸胃較弱的天蠍座。
12星座身體弱點
白羊：頭
金牛：頸、喉嚨
雙子：肺
巨蟹：胃、胸
獅子：心臟
處女：腹
天秤：腰、腎
天蠍：腸道、生殖器官
人馬：臀
山羊：骨骼、牙齒
水瓶：小腿、血管
雙魚：淋巴
示範：油塘讀者Ady
資料提供：占星師Jupiter（www.magiclife.com.hk）
