風靡英法　KateMoss×Topshop<br>2小時賣剩1條褲

風靡英法　KateMoss×Topshop
2小時賣剩1條褲

品牌要於時裝界立足似乎很容易，只要跟住「Crossover」這個不二法則，與乜乜國際品牌或者物物超紅巨星搞跨科合作，名聲保證即時升價十倍，成功例子當然要數最近的H&M，乘完Madonna、再乘KylieMinogue，國際時裝店之名紅到亞洲，夠晒威水。英倫時裝店Topshop就睇準目標，揀中超模KateMoss搞跨科，KateMoss設計，Topshop出產，夠晒Gimmick啦！甫開售立即掀起搶購潮，呢股KateMoss熱潮更加捲到法國潮流重地colette，成為Topshop罕有於英國以外地方出售的系列，遺憾未有聽聞Topshop會進駐香港，Fans們惟有望梅止渴，睇住花絮先。

記者、部份攝影：胡卓琳

最多可買5件

KateMoss系列的宣傳照，當然要由身為超模的KateMoss自己做埋Model力Sell啦！而且KateMoss仲搵埋自己一手提拔出來的人氣名模IrinaLazareanu做埋另一代言人。見到佢哋着得咁靚，當然吸引不少英倫的潮女支持啦！
一條牛仔褲賣50鎊、牛仔短褲賣30鎊、白背心賣12鎊，其實唔算好平，但Topshop網上店仍限定每個Style只可買1件，每次最多可買5件，咁多限制，皆因太搶手囉。

Topshop慧眼識KateMoss

Topshop於倫敦時裝界扎根多年，向來都以平靚取勝，曾經創下每分鐘賣出30對鞋、每日賣6,000條牛仔褲、每星期200,000人次銷售紀錄。今回Topshop重金300萬英鎊（約4,700萬港元）邀請人氣超模KateMoss設計個人系列，雖然KateMoss並不是在行的設計師，但卻與時裝界極有關連，她以脫俗自我的個人風格贏得時尚界的認同，KateMoss以自我的服飾打扮風格作為是次系列的設計靈感，系列中大約有80件產品，包括上衣、手袋、太陽鏡及皮褸等，價錢由12英鎊至150英鎊不等（約$187至$2,338港元）。各位有興趣睇貨的Fans們，可瀏覽Topshop官方網頁，除了一系列產品以外，還有KateMoss在工作室內試身的短片及廣告的製作花絮等等。未開售經已有超過30萬人次瀏覽，如此成功，Topshop果然夠慧眼。

www.topshop.com

■Topshop於總店另闢了一個專售KateMoss系列的Counter，Counter外圍滿KateMoss的造型照，而且長期都有一條等住入去的人龍。

「我哋喺倫敦住，平時最鍾意嚟TopShop買衫，因為款式多又唔貴，今次Topshop同KateMoss合作，啲衫款式好靚，我哋每人都買咗件Tee。」

Gin&Yor

「今朝睇新聞見到KateMoss嚟咗舖頭做宣傳，而且未開舖就大排長龍，所以放工特登嚟睇吓啲衫，發覺都幾靚，而且好有KateMoss風格。」

Lin

「我哋係KateMossFans，佢好有自我風格，就算知道要排長龍，都要專程搭車嚟睇佢啲衫，我哋買咗條窄身牛仔褲。」

Audrey&Doreen

「一個月前留意到Topshop網頁公布即將推出的KateMoss系列，已經好期待，雖然我沒有購買，不過就喺門口拎咗一支KateMoss礦泉水做留念。」

Rebecca

「我本身係Topshop的超級Fans，今次同KateMoss合作當然要嚟支持，我買咗兩件KateMoss系列的背心。」

Sarah

賣到過法國colette2小時售罄

英國的Topshop×KateMoss系列掀起的搶購熱翌日已經傳到法國，事緣係Topshop罕有地將系列出售於英國以外的地方，全系列放於法國潮流重地colette店出售，情況當然依然墟冚，2個鐘內賣剩一條褲，咁鬼誇張，真係絕對唔可以睇小時裝的威力。
colette是一間selectshop，店內售賣各大設計師的名牌，由現任掌舵人Sarah的母親Colette創立，現由女兒接手，身兼老闆及買手的Sarah每季均會到世界各地挑選貨品，她選貨絕對有性格，不會每個系列都入，反而只會購入她認為出色的Item，開舖10年就建立了一個潮流重地的形象，就連碧咸嫂Victoria走訪巴黎都要一到購物，加上與CommedesGarcons合作之外，名聲更加大增，成為潮流人士每到巴黎必到朝聖的舖頭，所以今次Topshop睇中colette成為法國的銷售點亦絕對合理。