黃德斌在新片《降頭》中有一場戲要穿三角褲上陣，並大騷他的40吋健碩胸肌，前晚他在旺角出席該片首映禮時笑言益了跟他同場拍攝的緋聞女友邵美琪，不過女方即反擊指無福消受，因為當日她要滴眼藥水，不能戴隱形眼鏡，所以甚麼也看不清。
由邵美琪（Maggie)、黃德斌及鄭浩南主演的電影《降頭》前晚在旺角朗豪坊舉行首映禮，導演邱禮濤、監製羅守耀及眾演員都有出席，任葆琳穿上性感低胸裙到場。
大歎可惜
黃德斌跟邵美琪合作拍攝無綫劇集《火舞黃沙》傳緋聞，今次緋聞情侶再度合作，黃德斌透露他在戲中飾演一名法力高強的降頭師，要同甚多的蛇蟲鼠蟻混在一起拍攝，當中有一幕是講述他被降頭反噬，搞到全身血淋淋，並需要袒胸露肌肉，只穿內褲上陣，令40吋胸肌大派用場，他笑說：「工作人員好好，安排咗好多唔同種類嘅底褲畀我揀，有圓腳、平腳，不過最後我揀咗條白色三角褲，同場有邵美琪一齊拍，益咗佢㖭！」
Maggie被取笑大有眼福，能一睹緋聞男友黃德斌的40吋胸肌加上三角內褲，Maggie笑着澄清說：「你有所不知，當日要我個樣好頹喪，所以要滴眼藥水搞到雙眼布滿紅筋，但滴嗰啲眼藥水戴唔到隱形眼鏡，加上同佢距離好遠，所以基本上係乜嘢都睇唔到，真係可惜。」問到蒙嘉慧已拜會鄭伊健的父母，Maggie聞言即說：「哈哈，睇戲喇。」
鄭浩南一身紅卜卜膚色現身，他解釋出席首映禮前去了海灘曬太陽，問他為何未見太太蹤影，他說：「太太喺大馬湊女，因為個女讀緊幼兒班。」問他可相信世上有降頭一事，他道：「我喺大馬見過晒啦，可以令一隻死雞復活，又可以要一個唔愛你嘅人同你結婚，不過我唔驚呢啲，驚乜呀？我都冇害人。」
採訪：何永寧
攝影：陳順禎
