吳君如去年誕下女兒後便全職湊B，小B女Jillian眨眼間已1歲大，長得非常趣致。前晚君如趁丈夫陳可辛從北京返港，一家三口齊齊出擊，偕父親夏春秋、母親、胞弟和其女友江美儀，三代同堂齊到灣仔大歎極品牛肉麵，但小B女見光怕怕，要躲在媽咪懷裏由老竇護駕速閃。
導演陳可辛近日剛於北京拍罷電影《投名狀》返港，被太太吳君如大讚為家庭型好男人的他，前晚即偕妻女、外父夏春秋和外母、舅仔Vincent和女友江美儀，齊到灣仔星街的「一碗麵」食肆開餐，共享天倫樂。
夏春秋心情靚
君如去年為丈夫誕下的囡囡Jillian，現已芳齡1歲，長相酷似陳可辛的小B女不知是否因久未見過爹哋，前晚顯得十分黐身，要坐在雙親中間的座位，平日在片場呼風喚雨的陳可辛大導全程忙於𠱁女，君如則望着夫女咪咪笑，畫面既幸福又溫馨。
現場所見，君如等人的桌上放滿大碗麵，他們除品嚐價值180元的極品牛肉麵外，也點了其他小食，當中又以吳媽媽胃口最好，各人停筷後，她依然吃不停。沒多久君如發現記者，即時舉起勝利手勢，背對記者的夏春秋、Vincent和江美儀也隨即擰轉面，齊齊展露笑容兼做出V字手勢。
急遮乖女容顏
反觀陳可辛則表現得較為嚴肅，板起面孔及起身擋鏡，君如則遮實女兒的臉，抱着她匆匆上車，其後夏春秋才偕妻兒尾隨離開。對於前晚三代同堂樂敍天倫，昨日陳可辛接受電話訪問時只不斷報以笑聲，他說：「唔答啦，我點會答你呢啲吖？」提到君如曾表示有意繼續造人，他同樣笑道：「唔會答你，你鍾意寫乜嘢就寫乜嘢啦。」
採訪、攝影：娛樂突發組
話你知：極品牛肉麵倪震都啱
吳君如與家人日前同到位於灣仔聖佛蘭士街、以上海麵作主打的一碗麵樂敍天倫，該店一向頗受明星名人歡迎，上月初倪震便曾與擔任模特兒的新女伴EstherS到一碗麵撐枱腳。
一碗麵由法國菜名店Olala老闆肥仔周開設，店內菜式不多，除麵食外，就只有上海前菜及越南小吃供應，重質不重量。該店的馳名牛肉麵，全店最平的也要60元一碗，最貴的極品牛肉麵更要180元。
