無綫電視前高層黃家亮，懷疑因患上抑鬱症，日前喺胞姊位於彩虹邨嘅寓所吊頸自殺身亡，終年48歲。有消息指黃母以前都係有抑鬱症，喺同一單位懸樑自盡，但馮仁昭得悉原來就連黃家亮嘅阿姨，即係黃母嘅胞妹都慘受此病折磨，同樣係吊頸輕生，令人歎息不止。
不設扶靈儀式
據知黃家亮嘅喪事會由其生前好友、英皇高層吳雨，同埋無綫綜藝及體育科製作主任何小慧協力籌辦，暫定喺本月22號於世界殯儀館設靈，翌日舉殯。喪禮以天主教儀式進行，然後火化，目前正找尋天主教墳場安放骨灰。黃家亮生前同一眾傳媒非常友好，故此喪禮會開放畀記者入內弔唁，不過就唔會有扶靈儀式。
另外，薛家燕前晚喺尖沙嘴文化中心欣賞音樂劇《兵馬俑》，提到黃家亮嘅事，佢話：「我覺得佢個人好開朗，成日都笑，但估唔到佢會放棄自己。人生有順逆境，唔應該太介懷。」對於林建明自責冇向黃家亮提供幫助，令佢情緒抑鬱，家燕姐就話：「千祈唔好怪責自己，前日見過佢（林建明），佢都冇乜嘢，有病真係要睇醫生。」
