駕車轉進街角，心儀已久的她在雨中撐着傘子，我禮貌示意要不要搭便車，她笑着點頭。這場雨，或許是為了滋潤我的心靈，在心湖上留下漣漪，但點不知……佢一上車就掐住個鼻話我部車好鬼臭，把遮無地方擺搞到整濕佢件飲衫，而我仲因為大雨得滯睇唔清條路差啲炒車！唉，一踏入五月嘅立夏果然多雨水，唔想學我咁瘀，呢幾十蚊防雨防濕小工具絕對唔慳得！
記者：周達之
攝影：黃子偉、譚盈傑、何家亮
模持兒：Sukmi
防雨
保持視線清晰
揸車最怕遇上大雨影響能見度，所以雨季最好買定跣水劑，將車頭玻璃同側鏡嘅雨水彈走，咁就唔會影響視線，揸車都安全啲喇。
跣水勁過水撥
塗上一層之後，產品生產商嘅風洞實驗指出喺時速38km/h行駛時可以將雨水飛彈，連水撥都唔使開，不過開埋水撥效果當然更好喇，佢有效期長達2個月，仲有防油嘅特性。
噴射力強落雨即用
自問為人懶懶閒，唔係撞正落雨都唔省起要用跣水劑嘅你，不妨考慮呢隻AmetV，皆因佢噴射力特強，遇上落雨時只要伸隻手出車窗就可以噴勻成塊擋風玻璃，即刻有跣水效果，當然係停低架車先搞喇。
側鏡專用價錢平
原理係噴上一層超微粒子嚟減低水珠喺玻璃面嘅附着力，所以跣水能力非常好，而且價錢平，不過記住係側鏡專用，千祈唔好噴喺擋風玻璃。
CheckPoint：車身一樣要跣水
車身積水珠雖然唔會影響視線，不過酸雨水珠再加上太陽曬就好容易會侵蝕車身，所以雨季一到就更加要勤力打蠟，買支有跣水效能嘅車蠟就可以減少酸雨停留嘅機會喇，而且仲可除水迹及花痕，一物幾用。
防濕
有遮袋唔會整濕地毯
滴水嘅遮唔單止會整濕乘客衣物，仲會整濕地毯搞到架車易發霉，買定個遮袋就最醒目。
點擺都得
特製鈕扣，可以裝喺前後椅側及椅背，最多可袋5把遮。
長短皆宜
可伸縮，長遮或縮骨遮都合用，唔用時又可以縮埋一細嚿，放喺尾箱或儲物櫃，一啲都唔阻地方。
除臭遮袋
消臭抗菌，可摺合慳地方，最多可袋4把遮。
用埋膠地板更好
唔想滴濕地毯，除咗用遮袋之外，加埋塊地台膠板就更加理想喇，而呢款地台膠板1套4塊，可自行剪裁，適合大部份車輛。
同場加映
鐵騎士防水褸
呢件RSTaichiDryMaster防水電單車褸，有晒特厚護Pad，而且防水兼透氣。
防霉
清洗冷氣防發霉
天氣潮濕車內一陣臭味，可能係冷氣機有霉菌，而冷氣清潔劑好簡單就幫你清洗到冷氣槽，亁手淨腳。
防霉消毒
具強力防霉消毒能力，將清潔劑噴入入風口，清潔劑就會經過蒸發器、最後喺排水管排出，將整條冷氣槽殺菌消毒。
用法簡單
呢款噴霧式清潔劑勝在夠簡單，只需將冷氣調校到車內循環模式，釋出清潔劑嘅煙霧，關閉車門焗3、4分鐘後打開車門換換氣就搞掂。
超市吸濕珠一樣掂
車內亁爽係防霉防臭嘅最佳方法，車主亦可以喺超級市場買啲吸濕珠放喺車裏面，幾十蚊就有一個，簡單實惠。
燊哥教你雨季4招
除咗以上介紹嘅產品之外，雨季車主要注意嘅地方仲有好多，Nti汽車美容公司副經理燊哥就話要醒多你幾招咁話喎。
車門膠邊勿滲水
車門膠邊用得耐會老化容易滲水，滲入嘅水會流落座椅底下、地台皮之下嘅凹位，久而久之就會令到車身座椅發霉，所以車門膠邊有問題就一定要盡早更換，免得因小失大。
燈罩磨花要更換
夏季偶有傾盆大雨、能見度低，如果可以換個光猛啲XenonLight燈膽或加埋霧燈當然最好，不過有時盞燈光度降低係因為燈罩花咗，透光度低咗，所以換個新燈罩就能改善能見度。
胎紋深度要勤Check
踏入雨季要加倍注意胎紋，條胎磨蝕、坑紋唔夠深會影響排水能力。胎紋至少要有1mm深度，唔夠就要換胎，不過有時四條胎嘅磨蝕位置會唔同，呢種情況下只要將四條胎嘅位置調一調，就可以用盡條胎未磨蝕嘅地方，唔使換胎慳番一筆，但實際點樣調最好請教車房師傅。
水撥要夠彈力
選擇水撥應付雨季亦都十分重要，燊哥話買水撥最緊要係條膠邊有彈力，咁先可以刮到水。市面上水撥牌子眾多，但品質參差，而燊哥嘅個人經驗就覺得NWB品質唔錯。另外換水撥時，要小心唔好俾個鋼製嘅骹位拍落車窗度，唔少人就係咁拍裂咗塊擋風玻璃。
查詢
（a）台日汽車用品
地址：旺角黑布街99-99A號（23924244）
（b）AES汽車配件
地址：旺角黑布街80-82號 （23910370）
（c）NTI汽車美容
地址：炮台山威非路道18號（23452193）
（d）亞林電單車
地址：旺角黑布街29號（23859229）