日前舉行嘅南華對晨曦賽事，南華以2：1勝出，賽後發生球迷衝突事件，吳卓羲仲捲入其中，事後有網民喺香港討論區留言，話吳卓羲有份挑釁，向一對中年男女叫囂：「叫佢上嚟打我呀！」
曾經簽吳卓羲出碟嘅BMA老闆娘、南華足主羅傑承太太梁芷珊，噚日出面力撐吳卓羲，佢話：「我見到現場發生爭執，其中有明星足球隊嘅成員，我見尹揚明有份勸交，來龍去脈唔清楚，但件事唔關吳卓羲事，佢嗰日着到全身黑色，當時唔見佢喺度。」
學生哥挑釁
馮仁昭八過件事，當日明星足球隊坐喺龍門後面嘅VIP區，佢哋全部係晨曦嘅擁躉，晨曦先入一球，一分鐘後南華追平，郭政鴻、錢嘉樂同尹揚明不停講粗口叫囂，狂鬧球證，尹揚明仲向球場擲水樽，而一個坐喺山頂位嘅十幾歲學生哥，做咗個手指公向下嘅屎波挑釁手勢。
最後晨曦輸咗波，明星足球隊個個都好㷫，嗰個學生哥又講咗句：「𠵱家唔服輸呀？」郭政鴻即時衝上山頂位想打佢，好彩俾其他人㩒住咗。馮仁昭聯絡過學生球迷嘅媽咪，當時佢都在場，佢話：「我個仔係有唔啱，但係明星足球隊啲人使唔使咁對個細路哥呢？」
噚日郭政鴻話佢當日的確在場，但冇企圖打人，至於有冇同球迷爆發罵戰就拒作回應，佢話：「當時有球迷講嘢好挑釁，不停咁講，我哋都好克制，有咁多鏡頭、咁多差佬喺度，有衝上去打人嘅話點會冇事？有就大鑊啦！睇波吶喊助威一定有，但唔想多講啦，費事搞大。」
