有線10蚊台下月中正式成立，電視台烽煙四起。有線製作了一個約半分鐘的動畫宣傳該頻道，擺明寸無綫節目悶。該片段一開始便出現紅、綠、藍排列（無綫是藍、綠、紅）的三色標誌，還響起香港小姐的背景音樂，一位男士坐在沙發上看三色電視致瞌眼瞓，旁白是「呢位阿叔，畀咁多錢買部電視返嚟，睇嚟睇去都係呢三隻色，冇嘢呀，醒啦，睇吓，有條線呀，真係有線呀」，然後指一條繽紛頻道即將誕生。
希望刺激業界
有線執行董事徐小明昨日在電話中說：「條片係大家同事一齊度出嚟嘅，諗住抵死啲，有啲牙骱戰咁啫。事實上大家都睇咗免費電視咁多年，可以嘗試啲新嘢。」問他此舉可怕惹怒無綫，他說：「我喺得有線打工，如果要諗第二間機構點諗，咁係唔專業嘅表現，亦唔會做得好。」
據知有線除了打算請葛民輝加盟拍電視劇，還會找林文龍和郭可盈加盟拍劇、拍電影，更有意將龔如心的故事拍電視劇，現正尋求法律意見。
徐小明透露10蚊台將於下月中開台，現時正在物色場地和請嘉賓搞開台儀式，他說：「台名好快會有定案，呢個台可以刺激業界，唔使大家淨係同某一間電視台打關係，令整個演藝界有新氣象。𠵱家嘅電視台，無論喺音樂、電影同戲劇方面，同觀眾嘅溝通都不足，我哋呢條台嘅成立可以彌補到部份不足。」
