中貿林喺馬場贏到眉開眼笑，收完錢就立即鬆人，唔等到完場。此乃見好即收，唔會磨爛蓆，輸番落去。臨行前，中貿林話捐錢五千元畀中文大學哲學系校友會倡辦嘅「唐君毅學術基金」，並且叫咗遠居洛杉磯嘅老友化學J捐埋一份。左丁山話：「你又唔係讀哲學嘅……」中貿林話：「唐君毅名氣咁大，我當年都有去旁聽佢講課，中大哲學系校友會想籌款四十萬，搵雕刻家造銅像，立於新亞書院，我好贊成，要支持吓，𠵱家好多學生都唔知唐君毅係邊個，有銅像在新亞嘅話，會啓發啲新一代學生。」啱嘅，捐款為唐君毅造像趕及二○○九年新亞慶祝六十周年，好有意思。
之後碰到編輯M，佢話做完一個大project，成身鬆晒。乜咁大？原來就係「2007年香港八大高校優勢評比」，結果刊登於《信報月刊》五月號，編輯M港大畢業，當年喺《壹週刊》負責一個大project，就係「香江百人誌」，可說喺壹仔有史以來最好嘅出品，空前絕後。當年肥佬黎一聲令下；總編輯交畀編輯M負責一切編採工作，做到佢氣咳，三個月之內趕死線出貨，真係出到喎，全港讚好，嗰期壹仔賣斷市，有人上門追購。點知出版後，編輯M先至靜靜雞講，佢犧牲咗寫碩士論文時間，睇怕攞唔到港大碩士學位！幾年後編輯M入中大再讀碩士，先至平安咁畢業，故此佢對港大中大皆有感情。但係上次《信報月刊》有個排名表，話中文大學第一，港大第二，咁就傷感情矣，故此今年冇綜合排名，只有分類排名，你哋自己慢慢分析。
左丁山睇完《信報月刊》嘅調查研究，即刻下結論話中文大學仍然排名第一，唔信你哋自己買份《信報月刊》睇吓。稍令人意外嘅調查結果係《信報月刊》調查與教統局調查皆以中大畢業生嘅工作表現最佳，最令僱主滿意，中大畢業生喺中文能力，英語能力，工作態度，工作技能方面都領先港大畢業生，以點數取勝（7.54對7.41）。調查發現，港大2003年新生入學成績好好，港大生嘅「英語運用」平均分（2.68）高於中大（2.30）；或者可以推論，中大畢業生喺英語方面，得到中大教學幫助甚大，有增值！