人物：張堅庭
時間：2001年11月12日
地點：深圳羅湖商業城
經過：去年谷德昭被本報踢爆喺灣仔買老翻鹹碟，其實除咗肥谷之外，唔少圈中人都會偷偷買老翻，好似導演張堅庭咁，佢外父楊受成雖然開鐘錶珠寶店，但張堅庭竟然都走去深圳買老翻手錶，呢個世界真係乜人都有。
還價一半250蚊成交
事發喺01年11月12日夜晚9點幾，當時張堅庭同朋友逛深圳羅湖商業城，之後去到一間錶舖睇手錶。當時張堅庭攞住一隻當年幾受歡迎嘅意大利軍錶牌子PaneraiLuminor翻版錶，仲同個店員講價，店員開價500蚊，張堅庭還價250。雖然還價還一半咁多，但個店員都好爽快咁即刻應承，可見呢啲老翻錶食水幾深！
後來個店員打蛇隨棍上，問張堅庭買唔買勞力士，點知張堅庭窒番佢轉頭話：「勞力士？我大把啦，不如我賣畀你啦！」個店員梗係睬佢都儍啦！
至於張堅庭買嗰款手錶，正價要成4萬蚊，嗰次佢雖然買老翻俾記者影到相，但事後向張堅庭求證嗰陣，佢仍然死撐話絕對唔會買冒牌錶，又話當時只係陪朋友買：「我梗係唔會買冒牌錶啦，係我朋友買，我叫咗佢唔好買㗎喇！」
本欄逢周一至周六刊出