混血女模AmandaStrang為女攝影師戴妮廷拍的扮半裸照，早前在中環展出時被偷去，AmandaS.昨日得悉後，居然公開多謝偷相賊欣賞，無懼對方用肉照作猥褻行為，但卻不忿賊人未有留下$100作曬相費，真的搞笑！
混血女模AmandaStrang與方力申昨日在尖沙嘴為大家樂宣傳，兩人拖着手出場，十足重播《美女廚房》。兩人換上圍裙各自煮意粉，AmandaS.煮得有板有眼，方力申則雞手鴨腳，搞到煎鑊熊熊大火，意粉燒燶黐晒底，難為要試食的市民。
想出書教禮儀
問AmandaS.可想學女廚神蘇玉華出cookbook？她說：「我想出一本教人食西餐禮儀嘅書，因為我四歲時，爹哋就已經教我，但香港人好似唔係好多人有學過囉。」
戴妮廷早前在中環舉行相展，AmandaS.和梁洛施多張寫真照片被偷去，問AmandaS.可怕偷相賊用她的肉照作猥瑣行為？她居然說：「吓，真係估唔到俾人偷囉，我希望個賊開心啦！啲相俾人偷咗係我榮幸，即係佢欣賞我囉，咁佢都冇傷害到我囉。」她又說：「不過，個賊拎完相，至少要留低$100囉，因為人哋要畀錢再曬過啲相去貼！」
續新約加人工
方力申則謂與大家樂合作五年，新合約更獲加人工，他說：「自從《美女廚房》之後，因為咁相關嘅job合共有七位數字收入，好好酬勞。我唔怕交重稅，賺得多交得多。」他又謂將與母親提早慶祝母親節。
採訪：RubyWoo
攝影：ChanChiLam
