「ComedyClub」，對港人來說絕對是一個新概念。因為誰會想到有人居然願意在蘇豪區開一間無得飲無得食的舖頭，只得幾排櫈，只招呼觀眾得啖笑地睇棟篤笑？可是對於一些幽默感過剩與遲遲無Show出的落魄藝人來說，那個3平方米的舞台就化成他們表演的天堂。
記者：梁俊鵬 攝影：周旭文
CheapJoke≠爛Gag
踏進草根階層的禁地──蘇豪區，滿街也是西人。ComedyClub？中產人士收工無事幹，還是找人做馬騮戲娛樂自己？抑或像小記這類普通人走進蘇豪區找所謂ComedyClub已是笑話？帶着心虛，擦身幾個高大鬼佬，竄進了似Bar非Bar的地窖，終見親愛的香港人──表演者黃湛深。
全場雖只有約50多個座位，在微弱燈光加上狹窄的環境，人氣旺盛。「你知唔知鄭秀文最唔捨得邊個呀？」黃湛深問。「捨不得你……爺爺吖嘛！」幾乎所有觀眾都知道答案，但還是忍不住笑出來。「嗯！我知呢啲叫CheapJoke，但絕對唔係爛Gag，起碼CheapJoke啱Grammar。」地道香港人就是喜歡這套，難得沒窒息於中產的空氣中。
做低自己俾人笑
至於場地「TakeOutComedyClub」，由一位久居美國的竹升仔Jami創立，2月至今一直只有西人表演棟篤笑，然而英文普遍不靈光的香港人，也足以吸引老外笑餐死的，黃湛深是第一個：「起初我沒頭沒腦地聽到這裏有棟篤笑的遴選，於是將之前寫過的稿求其譯做英文。果然有老外觀眾，索性就用港人英文差做笑話，佢哋真係會笑。」
演藝畢業，做過教育電視、MK街頭賣笑、拍過三級片，最終黃湛深選擇棟篤笑作事業。「我也知蘇豪區是中產的集中地，我也想過究竟是否RightPlace、WrongPerson就夠惹笑。但我的願望還是想拉攏旺角的觀眾到蘇豪區，幫他們變得HighClass一點。」事關早前在YoPark表演過，黃湛深卻有不快經歷：「觀眾掛住食飯，都沒一個是專心睇演出。試過有人上台搶我支咪鬧我……」在ComedyClub，他找到自己的觀眾群，起碼都是真金白銀專誠來看Show。「我覺得自己就好似地下樂隊，未必夠Noise，但絕對有觀眾。」ComedyClub也成了新星試練場，日後路過蘇豪區，除飲飲食食外，也可以聽聽棟篤笑。
幕後策劃人：我唔信有人唔鍾意笑
老闆Jami逢開Show前總會走到台上用唔鹹唔淡的廣東話介紹ComedyClub：「我係竹升仔，我哋係嚟搞笑……」觀眾旋即報以笑聲。原來Jami同是棟篤笑匠。
在紐約土生土長，看着美國殿堂級笑匠JohnnyCarson的《TheTonightShow》成長，Jami在89年念大學時才初放笑彈：「當時有個棟篤笑比賽，我想只有幾個評判在場，所以比賽前一晚隨意準備了一些資料就走上台，誰知一上台看到全個禮堂都是同學、觀眾。」最後他竟然得到了第3名，自此他就發現自己原來也有幽默感，更添了「我唔信有人唔鍾意笑」這座右銘。
教戲宣傳一腳踢
做了10多年的零售業，又營運過旅遊網站，始終確定了「搞笑」就是他的事業。經過2年的資料搜集，Jami知道香港沒有類似的ComedyClub，把心一橫，明知蝕硬都於今年2月在蘇豪區租了一個地庫舖位，任由老外，本地薑自由發揮棟篤笑。「上年11月我辦了5個工作坊教人做棟篤笑，共有70個學生。現在共有15位表演者在這裏演出，其中13個是我的學生。」Jami對棟篤笑絕對堅持，為保持ComedyClub的純正，只在每個星期五、六晚上9點半有演出，其他時間也不願租給他人作音樂演出。日前又親身到藝術中心出席詹瑞文與許冠文的講座，宣傳ComedyClub也順道尋演出者。觀眾看得哈哈大笑，背後Jami花的功夫絕對唔講得笑！
TakeOutComedyClub
每星期五、六晚9點半皆有棟篤笑演出，看Show後便可憑入場券到鄰近的BhattiBar與表演者把酒對談。而在5月19日，更有免費的棟篤笑英文課程，詳情可致電查詢。
入場費：$100（包1杯飲品）
地址：中環伊利近街34號地庫
聯絡：62204436/[email protected]
網址：www.takeoutcomedy.com
大把碎星撐
愛死港文化
《同事三分親》鬼佬演員布偉傑：「香港無乜這類小型Show，而且我都唔鍾意睇英文棟篤笑，因為我太愛香港的文化，睇廣東話仲投入。」
場地好
一首《我D骨好痛》熱爆互聯網，主唱的組合朱凌凌成員亦是捧場客，成員白只：「這個地方很好，如果申請租用政府場地，有排都唔使搞。」
港式中文惹笑
農夫成員陸永：「蘇豪區多鬼佬，鬼佬又鍾意聽我哋講英文笑話，就好似我哋聽鬼佬講廣東話咁搞笑。」
有待發展
碧芝：「橫掂有個地方，不妨玩盡啲。CheapJoke仲有共鳴，但這種獨立表演Show仍要長時間的發展。」
