地產L自澳門回港一行，到中環「港式餐廳」食個早餐，埋單找數二十二蚊，貴唔貴？睇觀點與角度啦，地產L本係香港地產專家，兩年前到澳門開分店，公司為佢租咗間大屋，住得好爽，但兩年間澳門租金急升，樓價急升，到租約滿期，地產L嘅公司可能唔肯租大屋畀佢住咯。
食完早餐，地產L醒起自己在澳門寫字樓附近食早餐，亦係二十二蚊，兩年前只係十至十二蚊，相比起嚟，澳門貴咗好多噃，何況澳門人一般收入冇香港咁高？地產L對左丁山講：「我哋寫字樓最近續約，租金加五成，雖然係十五蚊一呎啫，但加幅好勁，喺中心區（葡京一帶）嘅甲級寫字樓，空置率降到4%-5%，租金急升，多數係外資企業承租。既然有咁多外資企業，當然帶來唔少expats，澳門啲豪宅租金與樓價有乜辦法唔升？即使係上車盤，以前賣六七十萬嘅（千零呎），𠵱家起碼百零萬，過往兩三年，我估計樓價上升一倍以上，好搵過香港好多！」
香港炒樓專家移師澳門就弊咯，普通澳門人邊度買得起樓呀。以前睇鍾偉民寫澳門街，係一個充滿南歐氣氛，懶洋洋，夠舒服，有文化遺蹟，人情味濃厚嘅小城，好適宜退休者居住。眨眼間，澳門變成拉斯維加斯式豪華賭場，地產帶頭，百物騰貴，唯一唔貴嘅就係人工，荷官除外。
未來幾年又點睇，地產L十分樂觀：「一定升㗎，豪華賭場陸續落成，威尼斯人七月就軟開張（softopening），設有三千間房，抄足拉斯維加斯威尼斯人嘅設計，但展覽會議廳更大，比香港會展大兩倍，將來會有好多會議/展覽在澳門舉行。參展人士晚上可去賭場睇表演，幾好呀！」冇人話呢樣唔好，不過一個人口不到五十萬人嘅城市，發達得如此急速，好多市民追唔上，點會冇深層次矛盾吖。好似柬埔寨咁，美國油公司Chevron在領海發現油田，陸地又話發現礦產，柬埔寨人正在驚緊一夜發達，對國家未必一定係好事。